بانی پاکستان قائد اعظم ؒ کے روشن خیال، اعتدال پسند اور جدید دنیا سے ہم آہنگ فلاحی اسلامی ریاست کے تصور کو انتہاء پسندی اور دہشت گردی کے عفریت نے مسخ کردیا ہے، الطاف حسین

لندن۔۔۔24،دسمبر2013ء

متحدہ قومی موومنٹ کے قائد جناب الطاف حسین نے کہا ہے کہ بانی پاکستان قائد اعظم محمد علی جناح ؒ کے افکار اور تعلیمات پر اصل روح کے مطابق عمل پیرا ہوئے بغیر ملک و قوم کو دہشت گردی اور انتہاء پسندی سے نجات نہیں دلائی جاسکتی ہے۔ قائد اعظم محمد علی جناح ؒ کے یوم پیدائش کے موقع پر اپنے بیان میں انہوں نے کہا کہ پاکستان میں ہر سال قائد اعظم محمد علی جناحؒ کا یوم پیدائش منایا جاتا ہے لیکن یہ امر انتہائی افسوس ناک اور دکھ کا باعث ہے کہ قیام پاکستان کو اتنے برس بیت گئے لیکن اب بھی ملک پر قابض 2فیصد مراعات یافتہ طبقہ آج بھی قائد اعظم محمد علی جناح کے تصورات ، افکار اور تعلیمات سے دور دکھائی دیتی ہے ۔انہوں نے کہا کہ قائد اعظم محمد علی جناح پاکستان کو روشن خیال، اعتدال پسند اور جدید دنیا سے ہم آہنگ فلاحی اسلامی ریاست بنانا چاہتے جس کے تحت ملک میں اقلیتوں کو بھی برابری کی بنیاد پر حقوق حاصل ہیں بلکہ انہیں اپنے مذاہب کے مطابق عبادت کرنے کا حق بھی دیا گیا ہے لیکن آج پاکستان میں انتہاء پسندی اور دہشت گردی کے عفریت نے قائد اعظم ؒ کے روشن خیال، اعتدال پسند اور جدید دنیا سے ہم آہنگ فلاحی اسلامی ریاست کے تصور کو مسخ کردیا ہے جو ملک کے ارباب اختیار و اقتدار اور محب وطن عوام کیلئے لمحہ فکریہ ہے ۔جناب الطاف حسین نے کہا کہ متحدہ قومی موومنٹ بانی پاکستان قائد اعظم محمد علی جناح ؒ کے تصوارت کے مطابق ملک و قوم کی تشکیل چاہتی ہے اور اس مشن اور مقصدکے حصول تک اپنی حق پرستانہ جدوجہد جاری رکھے گی۔