گلستان جوہر میں خاتون کو اجتماعی زیادتی کا نشانہ بنانے کے واقعہ پر ایم کیوایم شعبہ خواتین کااظہار مذمت

آئین و قانون کے تحت سخت سے سخت سزا دی جائے، شعبہ خواتین کا مطالبہ 

کراچی ۔۔۔21، دسمبر2013ء 

متحدہ قومی موومنٹ شعبہ خواتین کی انچارج و حق پرست رکن قومی اسمبلی محترمہ کشور زہرا اور اراکین نے گلستان جوہر میں خاتون کو اجتماعی زیادتی کا نشانہ بنانے کے واقعہ کی سخت ترین الفاظ میں مذمت کی ہے اور اس واقعہ میں ملوث افراد کو انسانیت سے مکمل طور پر عاری قرار دیا ہے ۔ اپنے مشترکہ بیان میں انہوں نے کہا کہ خواتین سے اجتماعی زیادتی کے واقعات میں اضافے کا ایک سبب یہ بھی ہے کہ ان واقعات میں ملوث ملزم گرفتاری کے بعد چھوٹ بھی جاتے ہیں جو کہ آئین و قانون کی صریحاً خلاف ورزی ہے اور معاشرے میں جاری ناانصافیوں کے تسلسل کی نشاندہی بھی کرتا ہے ۔ انہوں نے کہاکہ ملک بھر میں خواتین سے زیادتی کے واقعات کی روک تھام کیلئے ہرسطح پر مثبت اور تھوس اقدامات بروئے کار لائے جائیں اور ایسے واقعات میں ملوث عناصر کو عبرتناک سزائیں دی جائیں ۔ شعبہ خواتین کی انچارج و اراکین نے چیف جسٹس سندھ ہائی کورٹ سے مطالبہ کیا کہ گلستان جوہر میں خاتون کو اجتماعی زیادتی کا نشانہ بنائے جانے کے واقعہ کا سنجیدگی سے نوٹس لیاجائے ، اس میں ملوث مفرور ملزمان کو فی الفور گرفتار کیاجائے اور گرفتار ملزم کو آئین و قانون کے تحت سخت سے سخت سزا دی جائے ۔