سندھ لوکل گورنمنٹ ترمیمی آرڈی نینس شہری علاقوں کے ساتھ ناانصافی ہے، ایم کیوایم رابطہ کمیٹی

کراچی۔۔۔14دسمبر2013ء

متحدہ قومی موومنٹ کی رابطہ کمیٹی نے سندھ حکومت کی جانب سے جاری کردہ سندھ لوکل گورنمنٹ ترمیمی آرڈی نیٹس کی شدیدمخالفت کرتے ہوئے اسے سندھ خصوصاًشہری علاقوں کے ساتھ سراسر ناانصافی قرار دیا اورمطالبہ کیاہے کہ آرڈی نیٹس کوکالعدم قراردیکرسندھ حکومت کوسندھ دشمن اقدامات سے باز رکھا جائے۔ ان خیالات کا اظہار ایم کیوایم کی رابطہ کمیٹی کے رکن کنور نوید جمیل نے ہفتے کی شب ایم کیوایم کی رابطہ کمیٹی کے ارکان عامرخان،عادل خان اورتوصیف خانزادہ کے ہمراہ خورشیدبیگم سیکریٹریٹ عزیزآباد میں پریس کانفرنس سے خطاب کے دوران کیا۔ کنور نوید جمیل نے کہاکہ سندھ حکومت جوگزشتہ پانچ سال برسراقتداررہی اوراس دورمیں کراچی ،حیدرآبادسمیت سندھ کے شہری علاقوں کے ساتھ تواتر سے زیادتیاں کرتی رہی ہے ۔انہوں نے کہاکہ سندھ حکومت اپنے اختیارات اوراتھارٹی کاناجائزاستعمال کرتے ہوئے کراچی دشمنی کاثبوت دے رہی ہے اورکراچی میں اپنا میئر لانے کی حتیٰ الاامکان کوشش کررہی ہے۔ انہوں نے کہا کہ کراچی میں میٹروپولیٹن کارپوریشن کا علاقہ40سے  50ہزار ووٹوں پر بنایا گیا تھا اس میں کچھ یونین کونسل ایسی بھی تھی جہاں صرف 12سوووٹ تھے۔انہوں نے کہاکہ ایک میونسپل کارپوریشن تھی اس میں بھی دیہی علاقہ شامل کردیا گیا تاکہ اس میں بھی اپنا میئرلایا جاسکے۔انہوں نے ٹنڈوالہیار اور نواب شاہ سمیت دیگر شہروں میں یونین کونسل میں کی گئی دھاندلیوں پر ہم نے عدالت سے رجوع کیاتوعدالت نے اس کودرست کرنے کاعندیہ دیااورفیصلہ ہمارے حق میں دیا۔تاہم سندھ حکومت نے اپنی غلطیوں کودرست کرنے کے بجائے ایک اور نوٹی فکیشن نکالاجس میں ڈی لیمیٹشن افسرکواختیاردیاگیاکہ وہ اس کوشہری علاقے میں شامل کرسکتاہے جس علاقے کو اربن ظاہر کیا جانا ہوگا۔ انہوں نے کہاکہ ایساممکن نہیں اس کیلئے حکومت پہلے اعتراضات سنتی ہے اورفیصلہ دیتی۔انہوں نے کہاکہ کل جونوٹی فیکشن جاری کیاگیاہے اس میں کہاگیاہے کہ یونین کونسل اور یونین کمیٹی کوبرابری کادرجہ دیاگیاہے ، نوٹی فیکشن میںیہ بات ظاہرکی گئی ہے کہ یہ نوٹی فیکشن 16ستمبرسے نافذ العمل ہوگا جوحکومت کی بدنیتی کوظاہرکرتی ہے۔ انہوں نے کہا کہ پیپلز پارٹی کی نااہل حکومت سندھ کے مستقل باشندے سندھی بولنے والے سندھیوں اوراردوبولنے والے سندھیوں کے درمیان دوریاں پیدا کرنے کوشش کررہے ہیں یہ سراسر انسانیت کے خلاف ورزی ہے اورجمہوریت کوڈی ریل کرنے کی گھناؤنی سازش ہے جس کی جتنی بھی مذمت کی جائے کم ہے۔ انہوں نے کہا کہ ہم سندھ حکومت کو متنبہ کرت ہیں کہ وہ سرکاری اختیارات کا ناجائز استعمال کرکے سندھ کے شہری عوام کومجبورنہ کرے کہ وہ احتجاج کاراستہ اختیارکریں۔ رکن رابطہ کمیٹی کنور نوید جمیل نے الیکشن کمیشن آف پاکستان سے اپیل کی کہ وہ سندھ حکومت کے ترامیمی نوٹی فیکشن کا نوٹس لے اورتمام اقدامات کو کالعدم قرار دیتے ہوئے سندھ حکومت کو سندھ دشمن اقدامات سے بازرکھے۔انہوں نے کہاکہ یہ الیکشن کو سپوتاز کرنے کی سازش ہے ،لوکل گورنمنٹ کے نظام کو پوری دنیا میں سپورٹ کیا جاتا ہے کیونکہ یہ خالصتا عوامی نمائندوں پرمشتمل ہوتا ہے۔ انہوں نے کہا کہ اس گورنمنٹ نے 2012ء کے پیپلزلوکل باڈی نظام کوختم کیا اور اب اس قسم کے اقدامات کے ذریعے ایک بار پھر بلدیاتی نمائندوں کے اختیارات کوچھینے کی کوشش کررہی ہے۔ انہوں نے حکومت سندھ سے مطالبہ کیا کہ کراچی کے لوگوں کے ساتھ ناانصافیوں کا عمل بند کیا جائے اورکراچی میں جتنی یونین کمیٹیاں ہیں انہیں یکساں آبادی کی بنیاد پربنایاجائے۔