یورپی پارلیمنٹ کی جانب سے پاکستان کو جی ایس پی پلس درجہ ملنے پر ایم کیوایم کی رابطہ کمیٹی کی مبارکباد
جی ایس پی پلس درجہ ملنے سے پاکستان برآمدات کے شعبے میں تیزی سے ترقی کریگا، رابطہ کمیٹی
کراچی:۔۔۔12؍دسمبر2013ء
متحدہ قومی موومنٹ کی رابطہ کمیٹی نے یورپی پارلیمنٹ کی جانب سے پاکستان کوجی ایس پی پلس کا درجہ ملنے پر حکومت پاکستان ،پاکستانی عوام اورصنعتکاروں کومبارکبادپیش کی ہے اور اسے برآمدات کے شعبے میں پاکستان کی بڑی کامیابی قرار دیا ہے۔ ایک تہنیتی بیان میں رابطہ کمیٹی نے کہا کہ یورپی پارلیمنٹرین کی بھاری اکثریت کی جانب سے پاکستان کوجی ایس پی پلس کادرجہ ملنے سے پاکستان کی برآمدات میں اضافہ ہوگا اور پاکستان 2017ء تک یورپی یونین کے ممالک کو پاکستانی مصنوعات نہ صرف برآمدات کرسکے گا بلکہ یورپ کے27ممالک کو ٹیکسٹائل مصنوعات بغیر ڈیوٹی بھی برآمد کرسکے گاجوبرآمدات کے شعبے صنعتی اور شعبے میں پاکستان کی بڑی کامیابی ہے۔ رابطہ کمیٹی نے مزید کہا کہ پاکستانی مصنوعات کی انٹرنیشنل مارکیٹ میں پہلے ہی بہت مانگ ہے اورپاکستان کو جی ایس پی پلس درجہ ملنے سے اس میں مزیداضافہ ہوگا اور ٹیکسٹائل سمیت دیگرپاکستانی مصنوعات یورپی ممالک بھیجی جاسکیں گی۔ رابطہ کمیٹی نے پاکستان کوجی ایس پی پلس کادرجہ ملنے پرایک بار پھر حکومت پاکستان، پاکستانی عوام اور صنعتکاروں کو مبارکبادپیش کی اورامید ظاہر کی کہ وہ پاکستانی مصنوعات کو یورپی ممالک میں پھیلانے اور یورپی ممالک میں پاکستان کا نام روشن کرنے کیلئے نئے جوش وجذبے کے ساتھ کام کرینگے ۔