ایم کیوایم کی حق پرستانہ جدوجہد میں ہزاروں شہداء کا لہو شامل ہے، الطاف حسین

لندن۔۔۔8، دسمبر2013ء

متحدہ قومی موومنٹ کے قائد جناب الطاف حسین نے کہا ہے کہ ایم کیوایم کی حق پرستانہ جدوجہد میں ہزاروں شہداء کا لہو شامل ہے، ایم کیوایم شہداء کی لازوال قربانیوں کو ہرگز رائیگاں نہیں جانے دیگی،حق پرستی کی تحریک کے شہداء نے جس مشن ، مقصد اورنظریئے کے حصول کیلئے اپنی جانوں کا نذرانہ پیش کیا ہے وہ ایم کیوایم کا قیمتی اثاثہ ہیں اور آج بھی ایم کیوایم کے بارے میں ملکی اور بین الاقوامی سطح پر کی جانے والی سازشوں اور منفی پروپیگنڈوں کے خلاف شہداء کی قربانیاں سیسہ پلائی دیوار ثابت ہوں گی ۔’’یوم شہداء ‘‘ کے موقع پر اپنے بیان میں جناب الطاف حسین نے کہا کہ ایم کیوایم کی جدوجہد ملک میں رائج فرسودہ جاگیردارانہ ، وڈیرانہ اور سرمایہ دارانہ نظام کے خلاف اور ملک بھر میں 98فیصد غریب ومتوسط طبقے کی حکمرانی کیلئے ہے ۔ انہوں نے کہاکہ حق پرستانہ جدوجہد کی پاداش میں ایم کیوایم کے ہزاروں کارکنان کو شہید کردیا گیا ، سینکڑوں کو تشدد کا نشانہ بنا کر عمر بھر کیلئے معذوری کی زندگی گزارنے پر مجبور کردیا گیا ، گرفتاریوں کے بعد ایم کیوایم کے 35کارکنان آج تک لاپتہ ہیں اور آج بھی ایم کیوایم کے کارکنان اسیر ی کی کربناک زندگی گزار رہے ہیں۔انہوں نے کہاکہ جو تحریکیں شہداء کی قربانیوں کو فراموش کردیتی ہیں انہیں زمانہ بھول جاتا ہے اور ایسی تحریکیں حالات کے جبر کا شکار ہوکر ختم ہوجاتی ہیں لیکن ایم کیوایم کی تاریخ گواہ ہے کہہ اس نے اپنے شہداء کی لازوال قربانیوں کو کبھی فراموش نہیں کیا اور آج ایم کیوایم جس مقام پر ہے وہ شہداء کی عظیم قربانیوں کی مرہون منت ہی ہے ۔ انہوں نے کہا کہ حق پرستی کی راہ میں شہید ہونے والے ایم کیوایم کے کارکنان کی عظیم قربانیاں ہی حق پرستی کی تحریک کو منزل تک پہنچے کا راستہ دے رہی ہیں اور اس کی سمت کا تعین کرچکی ہے لہٰذا ایم کیوایم کے ذمہ داران و کارکنان تحریک کے شہداء کی قربانیوں کو ہمیشہ یاد رکھیں اور انہیں کبھی فراموش نہ کریں۔ جناب الطاف حسین نے حق پرستی کی راہ میں شہید ہونے والے ایم کیوایم کے تمام شہداء کو زبردست خراج عقیدت اور سلام عقیدت بھی پیش کیا اور ان کے بلند درجات اور لواحقین کیلئے صبر کی خصوصی دعا بھی کی۔