ایم کیوایم کے قائد الطاف حسین کی صدارت میں اہم تنظیمی اجلاس

لندن ۔۔۔7 دسمبر2013ء

متحدہ قومی موومنٹ کے قائدالطاف حسین کی صدارت میں ہفتہ کی شب اہم تنظیمی اجلاس ہوا ۔اجلاس تنظیمی شعبہ جات کی درخواست پر کیا گیا۔اجلاس میں رابطہ کمیٹی کے ڈپٹی کنوینرندیم نصرت، رابطہ کمیٹی لندن کے ارکان کے علاوہ پاکستان سے آئے ہوئے رابطہ کمیٹی کے رکن اورقومی اسمبلی میں پارلیمانی لیڈر ڈاکٹر فاروق ستار،سینیٹ میں ایم کیوایم کے پارلیمانی لیڈرسینیٹربابرغوری، سینیٹرحسیب خان، سینیٹربیرسٹر فروغ نسیم ، رکن سندھ اسمبلی روؤف صدیقی اورانٹرنیشنل سیکریٹریٹ کے ارکان نے شرکت کی جبکہ پاکستان میں رابطہ کمیٹی کے ڈپٹی کنوینر ڈاکٹر خالد مقبول صدیقی ،انجینئر ناصرجمال،ڈاکٹرنصرت، دیگراراکین رابطہ کمیٹی اورتمام تنظیمی شعبہ جات کے ارکان شریک تھے ۔ اجلاس سے خطاب کرتے ہوئے جناب الطاف حسین نے تمام شرکاء کوتحریک کے خلاف کی جانے والی سازشوں سے آگاہ کیا۔ انہوں نے کہاکہ تحریک کے خلاف کی جانے والی یہ سازشیں اورزہریلے پروپیگنڈے ایسی ہی سازشوں کاحصہ ہیں جن کاآغاز 19 جون 1992ء کوکیاگیاتھا لیکن تحریک کے تمام کارکنان اورقوم کاایک ایک فرد ان سازشوں سے اچھی طرح آگاہ ہے اوروہ چٹان کی طرح متحد ہے۔ اس موقع پر تمام ارکان رابطہ کمیٹی اورتمام تنظیمی شعبہ جات کے ارکان نے جناب الطا ف حسین کی قیادت پر مکمل اور بھرپور اعتماد کااظہارکرتے ہوئے کہاکہ دنیادیکھ لے کہ ہم قائدتحریک الطاف حسین کی قیادت میں کل بھی ایک تھے اورآج بھی ایک ہیں اورجو ایم کیوایم دشمن متعصب عناصر ایم کیوایم میں دھڑے بندیوں کے خواب دیکھ رہے ہیں وہ کل بھی اپنی ناپاک سازشوں میں ناکام ہوئے تھے اوراب بھی ان کی سازشیں ناکامی سے دوچارہوں گی۔