سابق رکن سندھ اسمبلی اور لیاقت آباد ٹاؤن کے سابق ناظم اسامہ قادری کو نامعلوم افراد نے کلفٹن سے اغواء کرلیا

کراچی :۔۔۔۔5دسمبر 2013ء

سابق رکن سندھ اسمبلی اور لیاقت آباد ٹاون کے سابق ناظم حافظ اسامہ قادری کوڈالمین مال کلفٹن سے نامعلوم افراد نے ان کو ڈبل کیبن ویگو GS-6707 میں اغواء کرکے نامعلوم مقام پرلے گئے ۔ متحدہ قومی موومنٹ کی رابطہ کمیٹی نے نامعلوم افراد کی جانب سے سابق رکن سندھ اسمبلی اور لیاقت آباد ٹاؤن کے سابق ناظم حافظ اسامہ قادری کے اغواء کرنے کے واقعہ پر سخت ترین الفاظ میں مذمت کی ہے اور واقعہ کو بزدالانہ کارروائی قرار دیا ہے۔ ایک بیان میں رابطہ کمیٹی نے کہاکہ شہر میں جاری ٹارگٹڈ آپریشن کے دوران ایم کیوایم کے متعدد ذمہ داران و کارکنان کو سرکاری ادار وں کے اہلکاروں کی جانب سے گرفتار کرنے کے بعد لاپتہ کیاجاچکا ہے جن کا تاحال کچھ علم نہیں ہے ۔ انہوں نے خدشہ ظاہر کیا ہے کہ اغواء کاروں کی جانب سے خدانخواستہ اسامہ قادری کو کوئی جانی نقصان نہ پہنچادیا جائے ۔ انہوں نے صدر پاکستان ممنون حسین ،وزیر اعظم پاکستان میاں نواز شریف ، وفاقی وزیر داخلہ چوہدری نثار احمد خان ، وزیر اعلیٰ سندھ سید قائم علی شاہ اور گورنر سندھ ڈاکٹر عشرت العباد سے پر زورمطالبہ کیا ہے اسامہ قادری کے اغواء کے واقعہ کا فوری نوٹس لیا جائے اور انہیں جلد از جلد بازیاب کرایا جائے۔