حیدرآباد میں ایک اہم صوبائی وزیر کی رہائشگاہ کے باہر پرامن احتجاج کرنیوالے معذور افراد کو پولیس تشدد اور انہیں دھکے دینے پر رابطہ کمیٹی کا اظہار مذمت

کراچی :۔۔۔۔5دسمبر 2013ء

متحد ہ قومی موومنٹ کی رابطہ کمیٹی نے حیدرآبادمیں ایک اہم صوبائی وزیرکی رہائشگاہ کے باہرپرامن احتجاج کرنے والے معذور افراد کو پولیس کی جانب سے دھکے دینے اوران کے ساتھ غیرانسانی سلوک کی سخت ترین الفاظ میں مذمت کی ہے اوراس عمل کوآئین وقانون اور انسانیت کے منافی قراردیاہے۔ایک بیان میں رابطہ کمیٹی نے کہاکہ اپنے حقوق کیلئے پرامن احتجاج ہر پاکستانی کا آئینی وقانونی حق ہے اور معذورافراد نہ صرف انسان بلکہ پاکستانی بھی ہیں جن کے ساتھ اس قسم کاسلوک انسانیت کی توہین کے مترادف ہے۔ رابطہ کمیٹی نے کہا کہ ہونا تویہ چاہیے تھا کہ معذور افراد سے ہمدردی کا اظہار کرتے اور ان کے مسائل کوسن کر حل کرنے کی تما م تر کو شیش کی جا تی لیکن انہوں نے پرامن معذورافراد کو پولیس گردی کے ذریعے دبانے کی کوشش کی جوان کی جاگیردارانہ ذہنیت کی عکاس ہے جس کی جتنی بھی مذمت کی جائے کم ہے۔ رابطہ کمیٹی نے پولیس تشدد کا نشانہ بننے والے معذورافرادسے دلی ہمدردی اور یکجہتی کا اظہار کرتے ہوئے ان کے ساتھ پولیس تشدد کی سخت ترین الفاظ میں مذمت کی اور مطالبہ کیا کہ پرامن معذور افراد پر تشدد اور انہیں دھکے دینے والے پولیس اہلکاروں کے خلاف سخت ترین کارروائی عمل میں لائی جائے اور معذور افراد کو ان کا جائز حق دیا جائے۔