بلوچستان یونیورسٹی کے اساتذہ کو کئی ماہ سے تنخواہوں کی عدم ادائیگی پر ایم کیوایم رابطہ کمیٹی کے ارکان یوسف شاہوانی اور اسلم آفرید ی کااظہار تشویش

کراچی ۔۔۔4، دسمبر2013ء 

متحدہ قومی موومنٹ کی رابطہ کمیٹی کے ارکان یوسف شاہوانی اور اسلم آفریدی نے بلوچستان یونیورسٹی کے پروفیسرز کو کئی ماہ سے تنخواہوں کی عدم ادائیگی پر گہری تشویش کااظہار کیا ہے اور اس عمل کو پروفیسرز کے ساتھ کھلی نانصافی قرار دیا ہے ۔ اپنے مشترکہ بیان میں رابطہ کمیٹی کے ارکان نے کہاکہ بلوچستان یونیورسٹی صوبہ بلوچستان کا سب سے بڑا تعلیمی ادارہ ہے اور یہاں سے فارغ التحصیل طلباء ملک کی تعمیر و ترقی میں نمایاں کردارادا کرتے ہیں ۔رابطہ کمیٹی کے ارکان نے کہاکہ بلوچستان یونیورسٹی کے پروفیسرز اور ان کے اہل خانہ تنخواہوں کی عدم ادائیگی کے سبب کسمپرسی کی زندگی گزارنے پر مجبور ہیں اور یہ صورتحال کسی بھی مہذب ملک کے حکمرانوں کو زیب نہیں دیتی ۔ رابطہ کمیٹی کے ارکان یوسف شاہوانی اور اسلم آفریدی نے وزیراعظم نواز شریف ، وفاقی وزیر تعلیم اور حکومت بلوچستان سے مطالبہ کیا کہ بلوچستان یونیورسٹی کے پروفیسرز کو فی الفور تنخواہوں کی ادائیگی کی جائے اور پروفیسر کا معاشی استحصال بند کرایاجائے ۔