شیعہ رہنما علامہ دیدارحسین جلبانی کاقتل کراچی میں فرقہ وارانہ فساد کی آگ بھڑکانے اورعوام کے اتحاد کو پارہ پارہ کرنے کی سازش کا حصہ ہے۔ ا لطاف حسین
کل اہل سنت سے تعلق رکھنے والے مفتی احمدمدنی اورڈاکٹرطاہرعثمان کو ٹارگٹ کیاگیااورآج شیعہ رہنماعلامہ دیدارحسین جلبانی کو نشانہ بنایا گیا ہے
بعض قوتیں کراچی میں فرقہ وارانہ بنیاد پر لوگوں کوچن چن کرقتل کررہی ہیں تاکہ شہر میں فرقہ وارانہ فساد کی آگ بھڑکائی جائے اورعوام کے اتحادکوپارہ پارہ کیاجائے
عوام خدارا ان سازشوں کوسمجھیں ، ہرگز مشتعل نہ ہوں،فرقہ وارانہ فساد کی ان سازشوں کو ناکام بنادیں
لندن ۔۔۔3، دسمبر2013ء
متحدہ قومی موومنٹ کے قائدجناب الطاف حسین نے شیعہ رہنما علامہ دیدارحسین جلبانی کے قتل کی شدیدالفاظ میں مذمت کرتے ہوئے کہاہے کہ یہ واقعہ کراچی میں فرقہ وارانہ فساد کی آگ بھڑکانے اورعوام کے اتحادکوپارہ پارہ کرنے کی سازش کا حصہ قرار دیا ہے۔ اپنے ایک بیان میں جناب الطا ف حسین نے کہاکہ گزشتہ روز اہل سنت سے تعلق رکھنے والے مفتی احمد مدنی اور ڈاکٹر طاہرعثمان کو فیڈرل بی ایریا میں ٹارگٹ کیا گیا اور آج شیعہ رہنما علامہ دیدارحسین جلبانی کونشانہ بنایا گیا ہے جس سے صاف ظاہر ہوتا ہے کہ بعض قوتیں کراچی میں فرقہ وارانہ بنیاد پر لوگوں کوچن چن کرقتل کررہی ہیں تاکہ شہر میں فرقہ وارانہ فساد کی آگ بھڑکائی جائے اورعوام کوفرقہ وارانہ بنیادوں پر آپس میں لڑا کران کے اتحاد کو پارہ پارہ کیاجائے۔ جناب الطاف حسین نے کہاکہ فرقہ وارنہ قتل کے تسلسل کے ساتھ ہونے والے یہ گھناؤنے واقعات ملت اسلامیہ کے اتحاد کیخلاف کی جانیوالی گھناؤنی سازشوں کا حصہ ہے، عوام خدارا ان سازشوں کوسمجھیں اوران واقعات پر ہرگز مشتعل نہ ہوں بلکہ اپنے اتحاد سے فرقہ وارانہ فسادکی ان سازشوں کوناکام بنادیں ۔ انہوں نے علامہ دیدارحسین جلبانی، مفتی احمد مدنی اورڈاکٹرطاہرعثمان کے اہل خانہ، احباب اورعقیدت مندوں سے دلی تعزیت کااظہار کیااوردعاکی کہ اللہ تعالیٰ علامہ دیدار حسین جلبانی، مفتی احمد مدنی اور ڈاکٹر طاہرعثمان کی مغفرت فرمائے، انہیں جنت الفردوس میں جگہ دے اور لواحقین کو صبرجمیل عطا کرے۔