نیٹو سپلائی اور ڈرون کے بارے میں ڈاکٹر طاہر القادری کا بیان حقیقت پسندانہ ہے۔ طارق جاوید
ڈاکٹر طاہر القادری اور قائد تحریک الطاف حسین میں ملکی مسائل کے حل کے بارے میں ذہنی ہم آہنگی ہے جس کا مظاہرہ اس سے قبل بھی دیکھنے میں آیا ہے
ڈرون حملوں کے خلاف جلسے جلوس سے امریکہ کی صحت پر کوئی اثر نہیں پڑے گا، اب ڈرون مار گرانے کا وقت ہے
لندن ۔۔۔ یکم دسمبر2013ء
متحدہ قومی موومنٹ کے سینئر رہنما طارق جاوید نے نیٹو سپلائی اور ڈرون کے بارے میں پاکستان عوامی تحریک کے سربراہ علامہ ڈاکٹر طاہر القادری کے بیان کاخیرمقدم کیاہے۔ اپنے بیان میں طارق جاویدنے کہا کہ ڈاکٹر طاہر القادری اور قائد تحریک الطاف حسین میں ملکی مسائل کے بارے میں ذہنی ہم آہنگی ہے جس کا مظاہرہ اس سے قبل بھی دیکھنے میں آیا ہے۔ انہوں نے ڈرون حملوں اورنیٹو سپلائی کے حوالے سے بھی جن خیالات کا اظہار کیا ہے وہ مثبت ہیں۔ چند روز قبل قائد تحریک الطاف حسین نے ایک اجلاس سے خطاب کرتے ہوئے کہا تھا کہ احتجاج کرنے والی جماعتوں کوچاہیے کہ وہ ایوان صدریاوزیراعظم ہاؤس کے سامنے تادم مرگ دھرنادیں اوریہ مطالبہ کریں کہ حکومت پاک فضائیہ کوڈرون مارگرانے کاحکم دے کیونکہ اب ڈرون حملوں کے خلاف احتجاجی جلسے جلوس سے امریکہ کی صحت پر کوئی اثرنہیں پڑے گا بلکہ اب ڈرون مارگرانے کاوقت ہے۔ اب اسی بات کوآگے بڑھاتے ہوئے ڈاکٹر طاہر القادری نے بھی یہ بیان دیاہے کہ نیٹو سپلائی بند کرنے سے کچھ نہیں ہوگا بلکہ اب ڈرون گرائے جائیں۔ طارق جاوید نے ڈاکٹر طاہر القادری کے بیان کا خیرمقدم کیا اور اسے حقیقت پسندانہ قرار دیا۔