ذمہ داران، عوام کو درپیش مسائل کے حل کیلئے ہر ممکن کوشش کریں، الطاف حسین
عوام اپنے علاقوں میں فرقہ وارانہ ہم آہنگی اور قیام امن کیلئے اپنا کردار ادا کریں، الطاف حسین
مختلف تنظیمی شعبہ جات کے ذمہ داران کے اجلاس سے قائد ایم کیوایم الطاف حسین کا ٹیلی فونک خطاب
لندن۔۔۔29، نومبر2013ء
متحدہ قومی موومنٹ کے مرکز نائن زیروعزیزآبادمیں ایم کیوایم کے مختلف تنظیمی شعبہ جات کے ذمہ داران کا اجلاس ہوا۔ اجلاس سے قائد تحریک جناب الطاف حسین نے ٹیلی فون پر مختصر خطاب کیا۔ اجلاس میں ایم کیوایم کی رابطہ کمیٹی کے ارکان اور حق پرست منتخب عوامی نمائندے بھی شریک تھے۔ اجلاس میں ملک کی مجموعی صورتحال اور مختلف تنظیمی امور پر تفصیلی تبادلہ کیا گیا۔ اس موقع پر ایم کیوایم کے ذمہ داران نے جناب الطاف حسین کو کراچی کے مختلف علاقوں میں ایم کیوایم کے تحت جاری عوامی رابطہ مہم کی تفصیلات سے بھی آگاہ کیا۔ اجلاس سے خطاب کرتے ہوئے جناب الطاف حسین نے ایم کیوایم کے ذمہ داران پر زور دیا کہ وہ ملک کی تازہ ترین صورتحال سے عوام کو آگاہ رکھیں اور عوام کو درپیش مسائل کے حل کیلئے ہرممکن کوشش کریں۔ جناب الطاف حسین نے عوام پر زور دیا کہ اپنے اپنے محلوں اور علاقوں میں فرقہ وارانہ ہم آہنگی اور قیام امن کیلئے اپنا کردار ادا کریں، اپنے علاقوں میں شرپسند اور انتہاء پسند عناصر پر نظر رکھیں اور ان کی موجودگی کی اطلاع فوری طور پر انتظامیہ کو دیں۔ انہوں نے عوام سے یہ بھی اپیل کی کہ وہ مکان فروخت کرتے یا کرایہ پر دیتے ہوئے اس بات کا خیال رکھیں کہ مکان انتہاء پسند عناصر کے ہاتھوں میں نہ چلا جائے۔