حیدرآبادمیں پولیس اہلکاروں کوفائرنگ کرکے قتل کے واقعات دہشت گردی اورشہرکاامن خراب کرنے کی سازش ہے ،رابطہ کمیٹی
حیدرآبادمیں چندمنٹوں کے وقفے سے پولیس اہلکاروں کوفائرنگ کرکے قتل کرنے کاسختی نوٹس لیاجائے،سندھ حکومت سے رابطہ کمیٹی کامطالبہ
کراچی :۔۔ 26 ؍ نومبر 2013ء
متحدہ قومی موومنٹ کی رابطہ کمیٹی نے حیدر آباد کے تین مختلف مقامات پرموٹرسائیکل سوارمسلح دہشت گردوں کی جانب سے 5پولیس اہلکاروں کو فائرنگ کرکے قتل کرنے کی سخت ترین الفاظ میں مذمت کی ہے اوراسے دہشت گردی قراردیتے ہوئے مطالبہ کیاہے کہ حیدرآبادمیں چندمنٹوں کے وقفے پولیس اہلکاروں کوفائرنگ کرکے قتل کرنے کاسختی نوٹس لیاجائے اورذمہ دارعناصرکے خلاف سخت ترین کارروائی کی جائے ۔ایک بیان میں رابطہ کمیٹی نے کہاکہ حیدرآبادکے علاقے لطیف آبادنمبر 8،2 اور سخی پیرمیں فائرنگ کے واقعات سوچی سمجھی سازش ہے جس کامقصدشہرکاامن خراب کرناہے ۔رابطہ کمیٹی نے فائرنگ کے واقعات جاں بحق ہونیوالے پولیس اہلکاروں کے سوگوارلواحقین سے دلی تعزیت وہمدردی کااظہارکرتے ہوئے تمام اہلکاروں کی مغفرت اورزخمیوں کی جلدومکمل صحت یابی کیلئے کی اورحکومت سے مطالبہ کیا کہ حیدرآباد پولیس اہلکاروں پرفائرنگ کے واقعات کی مکمل تحقیقات کروائی جائے اورفائرنگ میں ملوث دہشت گردوں کوگرفتارکرکے قرارواقعی سزادی جائے۔