جناب الطاف حسین نے معاشرے میں خواتین کو برابری کا درجہ دینے اور ان میں اعتماد پیدا کرنے کے لئے خواتین کو ہرسطح پر نمائندگی کا حق دلوایا ہے،کشور زہرا

کراچی۔۔۔26نومبر2013ء

ایم کیو ایم شعبہ خواتین کی انچارج وحق پرست رکن قومی اسمبلی کشور زہرانے کہاہے کہ جناب الطاف حسین نے معاشرے میں خواتین کو برابری کا درجہ دینے اور ان میں اعتماد پیدا کرنے کے لئے خواتین کو ہرسطح پر نمائندگی کا حق دلوایا ہے۔یہ بات انہوں نے متحدہ قومی موومنٹ شعبہ خواتین کے زیر اہتمام خورشید بیگم سیکرٹریٹ عزیز آباد میں ’’خواتین پر تشدد کے خاتمے کے عالمی دن ‘‘کے حوالے سے منعقدہ پروگرام سے خطاب کرتے ہوئے کیا۔اس موقع پر شعبہ خواتین کی جوائنٹ انچارج نائلہ لطیف ،شعبہ خواتین کی اراکین سمیت کراچی کے مختلف سیکٹر ز و یونٹس کی ذمہ داران و کارکنان بھی موجود تھیں۔کشور زہرانے اپنے خطاب میں مزید کہا کہ جناب الطاف حسین نے خواتین پر تشدد کے خلاف ہمیشہ آواز اٹھائی ہے، عورت کو سرعام کوڑے مارنے کا واقعہ ہویا تیزاب پھینکنے کا ایم کیو ایم نے ہمیشہ ایسے تمام واقعات کی شدید مذمت کی ہے۔انہوں نے کہا کہ خواتین کو انکا اصل مقام دلانے کے لئے جو کوشش اور کاوشیں ایم کیو ایم نے کی ہیں وہ کسی سے ڈھکی چھپی نہیں ہیں۔اس موقع پر شعبہ خواتین کی جوائنٹ انچارج نائلہ لطیف نے کہا کہ آج ساری دنیا میں خواتین پر تشدد کے حوالے سے دن منایا جارہا ہے،معاشرے میں بھی عورت عدم مساوات کے ساتھ ساتھ تشدد کا سامنا کررہی ہے۔آج کی تعلیم یافتہ عورت اپنے حقوق کے حصول کی جدوجہد میں مصروف ہے ،لیکن آج کے دورمیں عدم تحفظ کا احساس عورت کو ترقی کی راہ میں سب سے بڑی رکاوٹ ہے۔