کراچی الیکٹرک سپلائی کارپوریشن اور کراچی واٹر بورڈ کے آپس کے تنازعہ کے باعث شہر کراچی میں پانی کے بحران پرحق پرست ارکان قومی اسمبلی کااظہار مذمت

کراچی ۔۔۔25، نومبر2013ء 

متحدہ قومی موومنٹ کے حق پرست اراکین قومی اسمبلی نے کراچی الیکٹرک سپلائی کارپوریشن اور کراچی واٹر بورڈ کے آپس کے تنازعہ کے باعث شہر کراچی میں پانی کے بحران کی سخت ترین الفاظ میں مذمت کی ہے اور کہا ہے کہ اداروں کی جانب سے آپسی تنازعہ میں شہریوں کو پانی جیسی بنیادی سہولت سے محروم کرنا نہ صرف افسوسناک بلکہ غیر ذمہ دارانہ عمل ہے ۔انہوں نے کہاکہ کے ای ایس سی اور کراچی واٹراینڈسیوریج بور ڈ کو چاہئے کہ وہ اپنے درمیان تنازعہ کا حل مل بیٹھ کر اورمشاورت سے نکالیں اوراس تنازع میں شہریوں کے حقوق پامال کرکے انہیں پانی جیسی بنیادی سہولت سے محروم رکھنے کاغیر قانونی اور غیر منصفانہ عمل فی الفور بند کردیں۔انہوں نے کہاکہ دنیا بھرمیں شہری سہولت کی فراہمی کے ادارے اپنے آپ کو بڑی سے بڑی آزمائشوں ، تنازعات اور مشکل حالات سے نکالنے کی جدوجہد کرتے ہیں لیکن ایسا کبھی نہیں ہوتے دیکھا گیا کہ ان اداروں نے باہمی تنازعات اورآزمائشوں کا بوجھ بھی شہریوں پر ڈال کر جان چھڑا لینے کاعمل کیا ہو ۔ حق پرست اراکین قومی اسمبلی نے وزیر اعظم نواز شریف ، وفاقی وزیر پانی و بجلی خواجہ آصف اور وزیر اعلیٰ سندھ سید قائم علی شاہ سے مطالبہ کیا کہ کے ای ایس سی اور واٹر بورڈ کے تنازع کے سبب کراچی میں پانی کے بد ترین بحران کے باعث شہریوں کو لاحق مشکلات اور پریشانیوں کا سنجیدگی سے نوٹس لیاجائے اورشہری سہولتوں کی فراہمی کے اداروں کی جانب سے اپنے آپسی تنازعات میں شہریوں کو نشانہ بنانے کا عمل فی الفور بند کرایاجائے ۔