ایم کیوایم کے رہنماؤں اور منتخب نمائندوں نے مختلف اسپتالوں اور جائے وقوعہ کا دورہ کیا
ایم کیوایم کے رہنماؤں نے امدادی سرگرمیوں میں ہاتھ بٹایا اور مشتعل عوام کو پرامن رہنے کی تلقین کی
ایم کیوایم میڈیکل ایڈ کمیٹی کے ارکا ن کو زخمیوں کی فوری امداد میں کوئی کسر اٹھانہ رکھنے کی ہدایت
متاثرہ افراد کے اہل خانہ کی مدد کیلئے عباسی شہید اسپتال میں جاں بحق اور زخمی ہونے والوں کی فہرست بھی آویزاں کردی گئی
کراچی ۔۔۔22، نومبر2013ء
ایم کیوایم کی رابطہ کمیٹی کے ارکان اور حق پرست ارکان اسمبلی انچولی میں بم دھماکوں کی اطلاع ملتے ہی جائے وقوعہ اور مقامی اسپتالوں میں پہنچ گئے جہاں انہوں نے امدادی سرگرمیوں میں ہاتھ بٹایا اور مشتعل عوام کو پرامن رہنے کی تلقین کی ۔ ایم کیوایم کی رابطہ کمیٹی کے ڈپٹی کنوینر ناصرجمال ، رابطہ کمیٹی کے ارکان ڈاکٹر فاروق ستار، حیدرعباس رضوی، عامرخان ،واسع جلیل، اسلم آفریدی اور حق پرست اراکین اسمبلی دھماکے کی اطلاع ملتے ہی عباسی شہید اسپتال پہنچے جہاں انہوں نے ایم کیوایم میڈیکل ایڈ کمیٹی کے ارکا ن کو زخمیوں کی فوری امداد میں کوئی کسر اٹھانہ رکھنے کی ہدایت کی ۔ ایم کیوایم کے رہنماؤں نے فیڈرل بی ایریا کے علاقے انچولی میں بم دھماکوں کی جگہ کا بھی دورہ کیا اس موقع پر وہاں دھماکے سے پھیلنے والی تباہی کے بعد کہرام مچا ہوا تھا اور عوام میں شدید اشتعال پایاجارہا تھا۔ ایم کیوایم کے رہنماؤں نے عوام کو پرامن رہنے کی تلقین کرتے ہوئے ان سے اپیل کی کہ وہ اپنے جذبات پر قابو رکھتے ہوئے زخمیوں کوفوری اسپتال منتقل کرنے میں ایم کیوایم اور خدمت خلق فاؤنڈیشن کے رضاکاروں کی مدد کریں ۔ اس موقع پر خدمت خلق فاؤنڈیشن کے رضاکاراورایمبولینس بھی بڑی تعداد میں امدادی سرگرمیوں میں مصروف تھیں۔ زخمیوں کی بڑی تعداد کے پیش نظر ایم کیوایم کے رہنماؤں نے زخمیوں کو ایک سے زائد اسپتالوں میں منتقل کرنے میں امداد فراہم کی جبکہ متاثرہ افراد کے اہل خانہ کی مدد کیلئے عباسی شہید اسپتال میں جاں بحق اور زخمی ہونے والوں کی فہرست بھی آویزاں کردی گئی ۔
رات گئے ایم کیوایم کے رہنماؤں نے انتظامیہ کی مد د سے شدید زخمیوں کو آغاخان اسپتال بھجوانے کے انتظامات کیے اور رات گئے تک حق پرست اراکین اسمبلی ڈاکٹر صغیراحمد اور عادل صدیقی آغاخان اسپتال میں موجود تھے ۔