حکومت، پارلیمنٹ ، عسکری اداروں اور سیاسی قیادت کو ملک اور عوام کو بچانے کیلئے واضح ایکشن لینا ہوگا، الطاف حسین

لندن۔۔۔22، نومبر2013ء

متحدہ قومی موومنٹ کے قائد جناب الطاف حسین نے پاکستانی عوام سے اپیل کی ہے کہ وہ ڈرون حملوں کی مخالفت کے نام پر اپنی سیاسی دکانیں چمکانے والوں سے سوال کریں کہ آخرانچولی کے بے گناہ اور معصوم عوام نے کیا قصور کیا تھا کہ انہیں ہولناک دھماکوں کا نشانہ بنایا گیا ۔ انہوں نے کہاکہ ڈرون حملوں اور نیٹو سپلائی کے خلاف شعبدہ بازی کرنے والے عوام کو جواب دیں کہ بم دھماکوں میں بے گناہ عوام کی جان ومال سے کھیلنے والوں کے خلاف دھرنا یا احتجاج کیوں نہیں کیا جاتا اور ملک وقوم کو دہشت گردی کی آگ میں جھونکنے والے دہشت گردوں کی حمایت کیوں کی جاتی ہے ؟جناب الطاف حسین نے عوام سے کہاکہ وہ ڈرون حملوں کے نام پر سیاسی دکانیں چمکانے والوں سے سوال کریں کہ آخر یہ لوگ پاکستان کے بے گناہ عوام ، فوج اور پولیس کے اہلکاروں کے سفاکانہ قتل پراپنے لبوں کو کیوں سی لیتے ہیں؟ جناب الطاف حسین نے کہاکہ پاکستانی عوام کا خون اتنا سستا نہیں ہے کہ انہیں ہرجانب سے دہشت گردی کا نشانہ بناکر مٹادیا جائے ۔ حکومت، پارلیمنٹ ، عسکری اداروں اور سیاسی قیادت کو ملک اور اس کے عوام کو بچانے کیلئے کوئی واضح ایکشن لینا ہوگا ورنہ نہ تو تاریخ ہمیں معاف کرے گی اور نہ ہی روزقیامت ہم اس مجرمانہ خاموشی کا جواب دے سکیں گے ۔

جناب الطاف حسین نے کراچی کے علاقے انچولی میں بم دھماکوں کی سخت ترین الفاظ میں مذمت کی ہے اور بم دھماکوں میں متعدد بے گناہ افراد کے شہید وزخمی ہونے پر گہرے دکھ اور افسوس کا اظہار کیا ہے ۔انہوں نے کہاکہ معصوم وبے گناہ شہریوں کی ناگہانی ہلاکتوں پرمجھے ذاتی طور پر دلی صدمہ پہنچا ہے اور میرا دل خون کے آنسو رورہا ہے ۔جناب الطاف حسین نے کہاکہ مجھے بخوبی احساس ہے کہ سانحہ انچولی کے شہداء کے سوگوارلواحقین کس آزمائش سے گزررہے ہیں اوراپنے پیاروں کے بچھڑجانے کا دکھ ان کیلئے کسی قیامت سے ہرگز کم نہیں ہے تاہم میری ان سے اپیل ہے کہ وہ مشیت الہٰی پرصبر کریں اور اس بات پر یقین رکھیں کہ اللہ تعالیٰ صبرکرنے والوں کے ساتھ ہے ۔جناب الطاف حسین نے شہداء کے لواحقین سے دلی تعزیت کا اظہارکرتے ہوئے کہاکہ دکھ کی اس گھڑی میں مجھ سمیت ایم کیوایم کے تمام کارکنان آپ کے غم میں برابرکے شریک ہیں ۔ جناب الطاف حسین نے دعا کی کہ اللہ تعالیٰ تمام شہداء کو جنت الفردوس میں اعلیٰ ترین مقام عطا فرمائے اور سوگوارلواحقین کو یہ صدمہ برداشت کرنے کا حوصلہ دے اور زخمیوں کو جلد ومکمل صحت یابی عطافرمائے۔(آمین)