رابطہ کمیٹی کے ارکان کے ہمراہ ایم کیوایم کے وفدکی ممتازشیعہ عالم علامہ طالب جوہری سے ملاقات

کراچی:۔۔۔20، نومبر2013ء

متحدہ قومی موومنٹ کے قائدجناب الطاف حسین کی ہدایت پر رابطہ کمیٹی کے ارکان عامرخان،عادل خان اورسیف یارخان کے ہمراہ ایم کیوایم کے نمائندہ وفدنے ممتاز شیعہ عالم علامہ طالب جوہری سے ان کی رہائشگاہ پرملاقات کی اور سانحہ راولپنڈی کو ملک بھر میں فرقہ وارانہ فسادات پھیلانے کی گھناؤنی سازش قراردیتے ہوئے فرقہ وارانہ ہم آہنگی،قیام امن و امان اوربھائی چارگی کے فروغ کیلئے قائدتحریک جناب الطاف حسین کاپیغام پہنچایا۔ایم کیوایم کے وفدمیں متحدہ علماء کمیٹی کے انچارج جاویداحمداورسائیٹ ٹاؤن کے سابق ناظم اظہار احمد خان کے علاوہ دیگرذمہ داران بھی شامل تھے۔اس موقع پررابطہ کمیٹی کے ارکان نے علامہ طالب جوہری سے گفتگو کرتے ہوئے کہاکہ ملک کی نازک ترین صورتحال میں سانحہ راولپنڈی فرقہ وارانہ فسادات کرواکرملک کوغیرمستحکم کرنے کی گھناؤنی سازش ہے جس کے پس منظر میں وہی قوتیں کارفرماہیں جو نہیں چاہتی کہ ملک میں امن وامان ہوخوشحالی آئے اورنفرتوں کاخاتمہ ہو۔ انہوں نے کہا کہ ملک کو بچانے اورسازشی عناصرکی گھناؤنی سازش کوناکام بنانے کیلئے مسلم امہ کے مسالک کے درمیان فرقہ وارانہ ہم آہنگی کی جتنی ضرورت آج ہے اس سے قبل نہیں تھی لہٰذاتمام مکاتب فکر کے علمائے کرام،مشائخ عظام ،ذاکرین اورعوام کافرض ہے کہ آگے آئیں اور اپنے اتحاد سے دشمنوں کی سازش کوناکام بنائیں۔انہوں نے مزید کہا کہ قائد تحریک جناب الطاف حسین کی جانب سے ملک قیام امن اورفرقہ وارانہ ہم آہنگی کے فروغ کیلئے کی جانیوالی اپیل پر تمام مسالک کے علمائے کرام ،مشائخ عظام ،ذاکرین اور عوام نے لیبک کہااورصبروتحمل اوربرداشت کا مظاہرہ کرتے ہوئے نفرتوں کو ختم کرنے کی بات کی وہ قابل ستائش ہے۔رابطہ کمیٹی کے اراکین نے شیعہ سنی سمیت تمام مکاتب فکرکے علمائے کرام، مشائخ عظام،ذاکرین اورعوام سے اپیل کی کہ وہ ملک میں فرقہ وارانہ ہم آہنگی کے فروغ کیلئے عملی کردار ادا کریں اور اتحاد واتفاق اور صبروتحمل کامظاہرہ کرتے ہوئے ملک دشمن عناصر کی تمام سازشوں کوناکام بنائیں۔ اس موقع پر علامہ طالب جوہری نے رابطہ کمیٹی کے اراکین سے اپنی گفتگو میں کہا کہ جناب الطاف حسین نے سانحہ راولپنڈی کی سب سے پہلے مذمتی بیان دیکرملک کے خلاف گھناؤنی سازش کوبے نقاب کیا ۔ انہوں نے کہاکہ ملک میں فرقہ وارانہ ہم آہنگی ،قیام امن اوربھائی چارگی کے فروغ کیلئے جناب الطاف حسین کی کاوشیں ناقابل فراموش ہیں۔انہوں نے اپنی جانب سے ہرممکن تعاون کا یقین دلایااورجناب الطاف حسین کی صحت وتندرستی اوردرازی عمرکیلئے دعائیں کیں۔