سنی اورشیعہ علماء، مشائخ اور ذاکرین سے ایم کیوایم کے قائد الطاف حسین کی پر زور اپیل

لندن ۔۔۔17نومبر2013ء

متحدہ قومی موومنٹ کے قائدجناب الطاف حسین نے راولپنڈی میں پیش آنے والے واقعات پر دلی افسوس کااظہارکرتے ہوئے تمام سنی اورشیعہ علماء، مشائخ اور زاکرین سے پرذوراپیل کی ہے کہ وہ اپنے اپنے حلقہ ء اثرمیں عوام سے دردمندانہ اپیل کریں کہ وہ کسی بھی واقعہ کی اطلاع ملنے پر کسی قسم کے فوری ردعمل کااظہارکرنے کے بجائے اس کی تصدیق کرلیں۔ اپنے بیان میں انہوں نے کہاکہ ایک ایسے وقت میں جبکہ پاکستان بہت ہی نازک صورتحال سے دوچارہے اوردشمن داخلی اوراندرونی طورپرہر طرح سے ملک کوکمزورکرنے کے ہتھکنڈے استعمال کررہا ہے، ہمیں جذبات اوراشتعال کے بجائے نہایت ہوشمندی اورصبروبرداشت سے کام لیناہوگا۔انہوں نے کہاکہ دشمن یہی چاہتاہے کہ کسی بھی طریقے سے پاکستان کو صفحہ ہستی سے مٹایاجائے اوراگرہم پاکستانیوں نے ہوش کے بجائے جوش سے کام لیاتوپھرہم بھی پاکستان دشمنوں کی سازشوں میں برابر کے شریک سمجھے جائیں گے لہٰذامیں ملک بھرکے شیعہ سنی علماء،مشائخ، زاکرین اور عوام سے دردمندانہ اپیل کرتاہوں کہ وہ ملک کے چپے چپے میں شیعہ سنی اکابرین پر مبنی علاقائی امن کمیٹیاں فی الفورتشکیل دیں جو اپنے اپنے علاقے میں شرپسندوں پرنظررکھنے کیلئے اپنے اپنے وقت پر باقاعدہ ڈیوٹیاں دیں اورامن برقراررکھیں۔