واقعہ کربلاصبر و رضا ، ایثار و قربانی اور عزم و استقامت کی لازوال مثال ہے، الطاف حسین

کراچی ۔۔۔14، نومبر2013ء 

متحدہ قومی موومنٹ کے قائد جناب الطاف حسین نے کہا ہے کہ واقعہ کربلا، حسینیتؓ کی فتح اور یزیدیت کی عبرتناک شکست ہے اور میدان کربلا میں حضرت امام حسینؓ نے ایثار وقربانی کی لازوال مثال قائم کرکے دین اسلام کو محفوظ بنایا۔ 

یوم عاشور کے موقع پر اپنے بیان میں جناب الطاف حسین نے کہاکہ نواسہء رسول ؐ حضرت امام حسینؓ اور ان کے رفقاء نے دین اسلام کی سربلندی اور حق و صداقت کی راہ میں اپنی اوراپنے اہل خانہ کی جانوں کے نذرانے پیش کیے لیکن یزیدیت کے آگے سر تسلیم خم نہیں کیا۔ انہوں نے کہا کہ واقعہ کربلا صبر و رضا ، ایثار و قربانی اور عزم و استقامت کی ایسی لازوال مثال ہے جوقیامت تک حق پرستی کے علمبرداروں کیلئے مشعل راہ ہے ۔ واقعہ کربلا، حسینیتؓ کی فتح اوریزیدیت کی عبرتناک شکست ہے اور میدان کربلا میں حضرت امام حسینؓ نے ایثار وقربانی کی لازوال مثال قائم کرکے دین اسلام کو محفوظ بنایا۔جناب الطاف حسین نے کہاکہ سید الشہداء حضرت امام حسینؓ اور اہل بیت سے سچی عقیدت و محبت کا تقاضہ ہے کہ ان کی تعلیمات اور زریں اصولوں پرمکمل طور پرعمل پیرا ہوکر باطل قوتوں کے بجائے اہل حق کا ساتھ دیاجائے اور مذہبی رواداری، فرقہ وارانہ ہم آہنگی اوراحترام انسانیت کے درس کوفروغ دیکر دین اسلام کی اصل تعلیمات کوعام کیا جائے اور پوری دنیا کو امن کا گہوارہ بنانے کی جدوجہد کی جائے ۔جناب الطاف حسین نے پاکستان بھر کے تمام مکاتب فکر سے تعلق رکھنے والے علمائے کرام سے اپیل کی کہ وہ احترام انسانیت ،اتحاد بین المسلمین اورفرقہ وارانہ ہم آہنگی کے فروغ اور امن و امان کے قیام کیلئے اپنا بھر پور اور عملی کردار ادا کریں اوراپنی تقاریر، خطبات اور مجالس میں بھائی چارگی کا درس دیں ۔