جماعت اسلامی ایک ملک دشمن جماعت ہے، جماعت اسلامی پرفی الفور پابندی عائد کی

کراچی ۔۔۔۔10 نومبر2013ء

متحدہ قومی موومنٹ کی رابطہ کمیٹی نے جماعت اسلامی کے امیرمنورحسن کے بارے میں مسلح افواج کے ترجمان آئی ایس پی آرکے مذمتی بیان کی مکمل حمایت کی ہے اورکہاہے کہ مسلح افواج کے افسروں ،جوانوں اورہزاروں معصوم وبے گناہ پاکستانیوں کے سفاک قاتل کو شہید قراردینے اور پاکستان کی سرحدوں کادفاع کرنے والے مسلح افواج کے افسروں اورجوانوں کی قربانیوں کی توہین کرنے سے ثابت ہوگیاہے کہ جماعت اسلامی دراصل ایک ملک دشمن جماعت ہے کیونکہ مسلح افواج کے خلاف ایسابیان کوئی ملک دشمن جماعت ہی دے سکتی ہے۔رابطہ کمیٹی نے چیف جسٹس سپریم کورٹ جسٹس افتخارمحمدچوہدری سے اپیل کی ہے کہ جماعت اسلامی پرفی الفور پابندی عائد کی جائے ۔ رابطہ کمیٹی نے کہاکہ جماعت اسلامی کے امیرمنورحسن نے ہزاروں معصوم وبے گناہ شہریوں کے سفاک قاتل اور مساجد ، امام بارگاہوں،بزرگان دین کے مزارات اوردیگرمذاہب کی عبادتگاہوں کوبموں سے اڑانے کے ذمہ داردہشت گرد کو شہید قرار دیکر اسلامی شعائر اورتعلیمات کی بھی توہین کی ہے اوراس سے ایک بارپھرثابت ہوگیاہے کہ جماعت اسلامی کااسلامی تعلیمات سے کوئی واسطہ نہیں ہے۔