آل پاکستان گڈز اینڈ ٹرانسپورٹ ایسوسی ایشن کے جائز مطالبات تسلیم کیے جائیں، حق پرست ارکان قومی اسمبلی

کراچی۔۔۔10، نومبر2013ء

متحدہ قومی موومنٹ کے حق پرست ارکان قومی اسمبلی نے آل پاکستان گڈز اینڈ ٹرانسپورٹ کے مطالبات کی مکمل حمایت کا اعلان کرتے ہوئے مطالبہ کیا ہے کہ آل پاکستان گڈز اینڈ ٹرانسپورٹ ایسوسی ایشن کے تحفظات دور کیے جائیں اورایسوسی ایشن کے جائز مطالبات تسلیم کیے جائیں۔ ایک بیان میں انہوں نے کہاکہ آل پاکستان گڈز اینڈ ٹرانسپورٹ ایسوسی ایشن نے گزشتہ چارروز سے ٹیکس میں اضافے کی مخالفت، امن وامان کے قیام اوردیگر مطالبات کے حق میں پورے ملک میں ہڑتال کااعلان کیا ہے لیکن اب تک وفاقی وصوبائی حکومتوں کی جانب سے ان کے تحفظات دورکرنے کیلئے کسی قسم کے اقدامات نہیں کیے گئے ہیں جس کے باعث ٹرانسپورٹ برادری میں گہری تشویش پائی جاتی ہے ۔ آل پاکستان گڈز اینڈ ٹرانسپورٹ کی ہڑتال کے باعث نہ صرف پاکستان بھرمیں کاروباری طبقہ شدید پریشانی کا شکار ہے بلکہ قومی معیشت کوروزانہ کروڑوں روپے کا نقصان بھی اٹھانا پڑرہا ہے ۔ حق پرست ارکان قومی اسمبلی نے وفاقی وصوبائی حکومتوں سے مطالبہ کیا کہ آل پاکستان گڈز اینڈ ٹرانسپورٹ ایسوسی ایشن کی ہڑتال کا فوری نوٹس لیاجائے ، ٹرانسپورٹ برادری میں پائے جانے والے تحفظات دور کیے جائیں اور ان کے جائز مطالبات تسلیم کیے جائیں۔