فرقہ واریت کے خاتمے کیلئے جناب الطاف حسین کی عملی کاوشیں نظر انداز نہیں کی جاسکتیں ، علامہ فرقان حیدر عابدی ، مولانا اسد دیو بندی

کراچی ۔۔۔9، نومبر2013ء 

متحدہ قومی موومنٹ کی رابطہ کمیٹی کے اراکین احمد سلیم صدیقی ، جاوید کاظمی اور عادل خان نے محرم الحرام کے موقع پر مختلف مکاتب فکر سے تعلق رکھنے والے علمائے کرام کے درمیان فرقہ وارانہ ہم آہنگی برقرار رکھنے اور مذہبی رواداری کے فروغ کیلئے معروف علماء علامہ فرقان حیدر عابدی اور ممتاز عالم دین مولانا اسد دیو بندی سے ان کی رہائشگاہوں پر ملاقات کی ۔ اس موقع پر حق پرست ارکان سندھ اسمبلی انور رضا ، عبد الحسیب اور ایم کیوایم کی علماء کمیٹی کے انچارج جاوید احمد اور اراکین بھی موجود تھے ۔ ملاقات میں علامہ فرقان حیدر عابدی اور مولانا اسد دیو بندی نے رابطہ کمیٹی کے اراکین سے گفتگو کرتے ہوئے کہاکہ ملک میں مسلم امہ کے مختلف مسالک کے درمیان فرقہ واریت کے خاتمے اوران میں مذہبی رواداری اور بھائی چارے کے قیام کیلئے جناب الطاف حسین اور ایم کیوایم کی عملی کاوشیں نظر انداز نہیں کی جاسکتیں، ایم کیوایم نے جس طرح سے کراچی اور سندھ کی سطح پر فرقہ واریت کا خاتمہ کیا ہے اسی طرح ملک کے دیگر صوبوں میں بھی سیاسی ومذہبی جماعتیں ایک دوسرے کے مسالک کے احترام کا درس دیکر مسلم امہ کے مسالک کا مثالی اتحاد قائم کرسکتی ہیں اور یہ اتحاد یقیناًملک ہی نہیں بلکہ ملت اسلامیہ کیلئے بھی مبارک ثابت ہوگا ۔ علمائے کرام نے تمام مکاتب فکر سے تعلق رکھنے والے عوام سے اپیل کی کہ وہ محرم الحرام کے موقع پر اپنے درمیان اتحاد اور بھائی چارے کی فضا برقرار رکھیں اور فرقہ واریت کو ہوا دینے والے عناصر پر کڑی نگاہ رکھیں ۔ علمائے کرام نے محرم الحرام اور دیگر اسلامی مہینوں کے موقع پر ایم کیوایم کی جانب سے جلوسوں کی گزرگاہوں پر کئے جانے والے انتظامات کو سراہتے ہوئے ملک سے دہشت گردی ، فرقہ واریت کے خاتمے ، امن و امان ، مذہبی رواداری اور بھائی چارے کے قیام کے علاوہ قائد تحریک جناب الطاف حسین کی درازی عمر اور صحت تندرستی کیلئے خصوصی دعا بھی کرائی۔اس موقع پر ایم کیوایم کی رابطہ کمیٹی کے اراکین نے علمائے کرام سے گفتگو کرتے ہوئے ان کے خیالات کو سراہا اور کہا کہ فرقہ واریت سے نکلے بغیر مسلم امہ کی ترقی و خوشحالی کا تصور بھی ناممکن ہے یہی وجہ ہے کہ قائد تحریک جناب الطا ف حسین نے فرقہ واریت کے خاتمے کیلئے نہ صرف عملی جدوجہد کی ہے بلکہ اس سلسلے میں انتہائی متحرک اور متاثر کن کردار اد ا کیا ہے ۔