گوجرانوالہ کی دو امام بارگاہوں میں مسلح دہشت گردوں کی فائرنگ کرنے پر رابطہ کمیٹی کااظہار مذمت
اس طرح کے دہشت گردی کے واقعات ملک میں فرقہ وارانہ فسادات کرانے کی گھناؤنی سازش ہے
صدر ، وزیر اعظم اور وفاقی وزیر داخلہ امام بار گاہوں پر فائرنگ کا نوٹس لیں ، رابطہ کمیٹی کا مطالبہ
کراچی:۔۔۔09؍ نومبر 2013ء
متحدہ قومی موومنٹ کی رابطہ کمیٹی نے گوجرانوالہ کی دو امام بارگاہوں میں مسلح دہشت گردوں کی فائرنگ کی سخت ترین الفاظ میں مذمت کی ہے اور فائرنگ کے نتیجے میں امام سمیت 3افراد کے ہلاکت پر گہرے دکھ اور افسوس کا اظہار کیا ہے۔ ایک بیان میں رابطہ کمیٹی نے کہاکہ ہے کہ دہشت گرد اس طرح کے دہشت گردی کے واقعات ملک میں فرقہ وارانہ فسادات کرانے کی گھناؤنی سازش کررہے ہیں جس کی جتنی بھی مذمت کی جائے کم ہے ۔ رابطہ کمیٹی نے جاں بحق ہونے والے افراد کے سو گوار لواحقین سے دلی تعزیت و ہمددری کا اظہار کر تے ہوئے انہیں صبر کی تلقین کی ۔ رابطہ کمیٹی نے صدر پاکستان ممنون حسین، وزیر اعظم میاں نواز شریف اور وفاقی وزیر داخلہ چوہد ری نثار سے مطالبہ کیا ہے کہ گوجرانوالہ میں امام بارگاہوں پر فائرنگ کا نوٹس لیا جائے اور اس میں ملوث دہشت گردوں کو گرفتار کرکے قانون کے مطابق سخت سے سخت سزا دی جائے ۔