کراچی میں فرقہ وارانہ بنیادپر ٹارگٹ کلنگ کے واقعات فرقہ وارانہ فساد کی آگ بھڑکانے کی گھناؤنی سازش کاحصہ ہیں۔رابطہ کمیٹی متحدہ قومی موومنٹ

کراچی۔۔۔ 4 نومبر2013ء

متحدہ قومی موومنٹ کی رابطہ کمیٹی نے کراچی کے مختلف علاقوں میں فرقہ وارانہ بنیادپر ٹارگٹ کلنگز کے واقعات کی شدیدالفاظ میں مذمت کرتے ہوئے کہاہے ٹارگٹ کلنگ کے یہ واقعات کراچی میں فرقہ وارانہ فساد کی آگ بھڑکانے کی گھناؤنی سازش کاحصہ ہیں۔ اپنے بیان میں رابطہ کمیٹی نے کہاکہ ایک منظم سازش کے تحت کراچی میں اچانک فرقہ وارانہ ٹارگٹ کلنگز کاسلسلہ شروع کردیاگیاہے۔ اورنگی ٹاؤن سیکٹر یونٹ 118-A کے کارکن منصورعلی جوکہ اہل تشیع ہیں انہیں آج صبح اورنگی ٹاؤن میں فائرنگ کرکے شہیدکردیاگیا۔اسی طرح لیاقت آبادکے علاقے میں زینت اسکوائرمیں ٹیلرنگ شاپ پر مسلح دہشت گردوں نے فائرنگ کی جس سے دکان کے مالک ندیم حیدر اور وہاں بیٹھے ہوئے ایم کیوایم یونٹ 157کے کارکن محمدمحسن اورشعیب جاں بحق ہوگئے جبکہ دوافرادزخمی ہوئے ۔ دہشت گردی کاایک اورسنگین واقعہ گلشن اقبال میں ہواجس میں سفاک دہشت گردوں نے ذوالجناح پر اندھادھندفائرنگ کی جس سے ذوالجناح شہید ہوگئے اوراس کے محافظ شان محمدبھی جاں بحق ہوگئے ۔ایم کیوایم کی رابطہ کمیٹی نے ان واقعات کی شدیدالفاظ میں مذمت کرتے ہوئے کہا کہ جس طرح آج کراچی میں تسلسل کے ساتھ یہ واقعات رونماہوئے ہیں اس سے صاف ظاہر ہے کہ محرم الحرام کے آغازکے قریب آتے ہی یہ سارے واقعات ایک منظم ساز ش کے تحت کرائے گئے ہیں جس کامقصدکراچی میں فرقہ وارانہ فسادات کی آگ بھڑکاناہے اور شیعہ اورسنی عوام کوآپس میں لڑاناہے۔ رابطہ کمیٹی نے کہاکہ عوام یہ سوال کرتے ہیں کہ شہرمیں جاری ٹارگٹڈ ایکشن کے باوجود فرقہ وارانہ قتل کے واقعات کس طرح ہورہے ہیں؟ رابطہ کمیٹی نے صدرممنون حسین ، وزیراعظم میاں نوازشریف، وفاقی وزیر داخلہ چوہدری نثار علی اوروفاقی وصوبائی حکومت سے مطالبہ کیاکہ ان واقعات کافی الفورنوٹس لیاجائے ، شہرمیں فرقہ وارانہ فسادات کی آگ بھڑکانے والے عناصرکے خلاف سخت کارروائی کی جائے۔ رابطہ کمیٹی نے شیعہ اورسنی عوام سے اپیل کی کہ وہ ان واقعات پر ہرگز مشتعل نہ ہوں اور پرامن رہ کرفرقہ وارانہ فسادات کی سازش کونا کام بنادیں۔ رابطہ کمیٹی نے دہشت گردی کے واقعات میں جاں بحق ہونیو الے افرادکے لواحقین سے دلی تعزیت کااظہارکیا اورجاں بحق ہونے والوں کیلئے دعائے مغفرت کی ۔