بلوچستان کے ذخائر پرقبضہ کرنے کامنظور شدہ بل پاکستان کومزید تقسیم کرنے کی سازش کا پیش خیمہ ثابت ہوگا لہٰذا اسے فی الفور واپس لیا جائے

لندن ۔۔۔ 14 دسمبر2022ئ

متحدہ قومی موومنٹ کے بانی وقائد جناب الطاف حسین نے پاکستان کے حکمرانوں کو متنبہ کرتے ہوئے کہاہے کہ بلوچستان کے ذخائر پرقبضہ کرنے کامنظور شدہ بل پاکستان کومزید تقسیم کرنے کی سازش کا پیش خیمہ ثابت ہوگا لہٰذا اسے فی الفور واپس لیا جائے۔گزشتہ روزسماجی ویب سائٹ ٹوئٹر پر اپنے تازہ ترین بیان میں جناب الطاف حسین نے کہاکہ گزشتہ روز سینیٹ کے ایوان میں ایک بادشاہانہ قرارداد منظور کی گئی جس کے تحت بلوچستان میں ریکوڈک کے ذخائر اور دیگرمعدنی وسائل کو وفاق کی ملکیت میں دے دیا گیاہے، انہوں نے کہاکہ اس سے کہیں زیادہ بہتر تھا کہ بلوچستان کا نام نہاد صوبے کادرجہ ختم کرکے اسے وفاق کی اعلانیہ کالونی بنادیا جاتا، اس ظالمانہ قرارداد پرصرف ان لوگوں نے آنسو بہائے جن کا تعلق صوبہ بلوچستان سے ہے۔انہوںنے کہاکہ گزشتہ روز کی یہ قرارداد پاکستان توڑنے کی ایک نئی سازش کا شاخسانہ ہے جس کی جتنی بھی مذمت کی جائے کم ہے۔ جناب الطاف حسین نے  بلوچستان میں ریکوڈک کے حوالے سے قرارداد کی سخت الفاظ میں مذمت کرتے ہوئے کہاکہ میں متنبہ کرتا ہوںکہ بلوچستان کے ذخائر پرقبضہ کرنے کا یہ منظور شدہ بل پاکستان کومزید تقسیم کرنے کی سازش کا پیش خیمہ ثابت ہوگا لہٰذا اسے فی الفور واپس لیا جائے۔ انہوں نے کہاکہ کیایہ حیرت کی بات نہیں کہ کینیڈا سے ریکوڈک کے معاہدے کو جس سپریم کورٹ نے دوسال قبل غلط قراردیا تھا آج اسی سپریم کورٹ نے اسے جائز قراردیکرمظلوم بلوچوں کے زخموں پر نمک پاشی کی ہے۔ جناب الطاف حسین نے کہاکہ میں بلوچستان کے عوام کے حقوق پر ڈاکہ زنی کے اس ظالمانہ فیصلے کو سراسر ظلم قراردیتا ہوں اور اس ظالمانہ فیصلے کے خلاف بلوچستان کے عوام کے ساتھ ہوں۔

٭٭٭٭٭