ایم کیوایم شعبہ خواتین کے زیر اہتمام ’’شہری حقوق کی پامالی ‘ ‘ کے عنوان سے پروگرام کا انعقاد

کراچی ۔۔۔30، اکتوبر2013ء 

متحدہ قومی موومنٹ شعبہ خواتین کے زیراہتمام گزشتہ روز ’’شہری حقوق کی پامالی ‘‘ کے عنوان سے پروگرام منعقد ہوا جس کی مہمان خصوصی سپرٹینڈینٹ پولیس معصومہ چنگیزی تھی ۔ پروگرام میں شہر کی ان خواتین نے بھی شرکت کی جن کے گھروں پر بغیر کسی سرچ و گرفتاری وارنٹ اور بنا کسی لیڈر اہلکار کے رات کی تاریکی میں قانون نافذ کرنے والے اداروں نے چھاپے مارے ، گھروں کی تلاشی لی، خواتین کو ہراساں کیا اور ان کے گرفتار شدہ بھائیوں او ربیٹوں کوریمانڈ سے قبل ہی اتناتشدد کا نشانہ بنایا گیا کہ ان میں کچھ معذور ہوگئے ، کچھ ابھی تک لاپتہ ہیں اور کچھ تشدد کی تاب نہ لاتے ہوئے ہلاک ہوگئے۔پروگرام کے شرکاء سے ایم کیوایم شعبہ خواتین کی ارکان ثروت عثمان ، رابعہ ماجد اور ایم کیوایم کے شہید کارکن عمران کی بیوہ طاہرہ عمران نے بھی اظہار خیال کیا اور خواتین کو درپیش مسائل اور مشکلات سے آگاہ کیا ۔ پروگرام میں سپرٹینڈینٹ پولیس معصومہ چنگیزی نے شہری حقوق کی پامالی کے موضوع پر اظہار خیال کرتے ہوئے کہا کہ قانون نافذ کرنے والے اداروں کی وردی خوف کی نہیں بلکہ احترام کی علامت ہے ، اگر کسی کے گھر پر بغیر سرچ وارنٹ ، لیڈی کانسٹیبل کے چھاپہ مارا جائے تو جن کے گھر پر چھاپہ مار کاروائی کی گئی ہے وہ وہ غیر اخلاقی اور غیر قانونی رویئے پر متعلقہ ادارے کے افسران اور اہلکاروں کی شکایت کا حق رکھتی ہے اور اس سلسلے میں رپورٹنگ سینٹر سے رجوع کرنا ہر کسی کا استحقاق ہے ۔