بلوچستان کے شہر نصیر آباد میں ’’KKFایمبولینس سروس ‘‘ شروع کردی گئی

نصیر آباد۔۔۔29، اکتوبر2013ء 

متحدہ قومی موومنٹ کے فلاحی ادارے خدمت خلق فاؤنڈیشن کی جانب سے بلوچستان کے شہر نصیر آباد میں ’’KKFایمبولینس سروس ‘‘ شروع کردی گئی ہے ۔ اس سلسلے میں گزشتہ روزایم کیوایم نصیر آباد زون میں تقریب منعقد ہوئی جس میں ایم کیوایم کی رابطہ کمیٹی کے رکن و حق پرست رکن سندھ اسمبلی محمد یوسف شاہوانی نے خصوصی طور پر شرکت کی اور خدمت خلق فاؤنڈیشن کی جانب سے ایمبولینس کی چابی خدمت خلق فاؤنڈیشن نصیر آباد کے ذمہ داران کے حوالے کی ۔ اس موقع پر ایم کیوایم نصیر آباد زون ، تحصیل ڈیرہ مراد جمالی کے انچارج و اراکین اور کارکنان بھی بڑی تعداد میں موجود تھے ۔ تقریب کے شرکاء سے گفتگو کرتے ہوئے یوسف شاہوانی نے کہاکہ قائد تحریک جناب الطاف حسین ملکی اور بین الاقوامی سیاست میں دکھی انسانیت کی خدمت کے معیار کو بلند کرنا چاہتے ہیں یہی وجہ ہے کہ ان کی جانب سے اپنی سیاسی جدوجہد سے قبل دکھی انسانیت کی خدمت کیلئے خدمت خلق کمیٹی کا قیام عمل میں لایا گیا ۔ انہوں نے کہاکہ نصیر آباد میں خدمت خلق فاؤنڈیشن کی ایمبولینس سروس سے جب لوگ بلا تفریق عملی طور پر مستفید ہونگے تو وہ خدمت خلق فاؤنڈیشن کے فلاحی اور رفاعی کاموں اور خدمات سے آگاہ ہوں گے اور یہ آگاہی ہی خدمت خلق فاؤنڈیشن کے فلاحی اور درفاعی کاموں میں وسعت کا سبب بنے گی ۔