ایم کیوایم قصبہ علیگڑھ سیکٹر کے کارکن آصف حسین کی شہادت پر الطاف حسین کا اظہار افسوس
لندن:۔۔۔28، اکتوبر2013ء
متحدہ قومی موومنٹ کے قائد جناب الطاف حسین نے ایم کیوایم قصبہ علیگڑھ سیکٹرکے جواں سال کارکن آصف حسین کی مسلح دہشت گردوں کی جانب سے فائرنگ سے المناک شہادت پرگہرے رنج وغم کا اظہار کیا ہے اور حکمرانوں سے مطالبہ کیا ہے کہ ایم کیوایم کے ذمہ داران و کارکنان کے تیزی سے بڑھتے ہوئے قتل کے واقعات کا فی الفور سنجیدگی سے نوٹس لیا جائے اور قتل وغارتگری میں ملوث دہشت گردوں کو گرفتار کرکے عبرتناک سزادی جائے۔ ایک بیان میں جناب الطاف حسین نے آصف حسین شہید کے سوگوار لواحقین سے دلی تعزیت وہمدردی کا اظہار کرتے ہوئے انہیں صبرکی تلقین کی اورکہاکہ دکھ اورافسوس کی اس گھڑی میں مجھ سمیت ایم کیوایم کے تمام کارکنان آپ کے غم میں شریک ہیں۔ جناب الطاف حسین نے دعاکی کہ اللہ تعالیٰ آصف حسین شہیدکواپنی جواررحمت میں اعلیٰ مقام عطا فرمائے اور سوگوار لواحقین کو صبر جمیل عطا کرے۔ (آمین)