ایم کیوایم لانڈھی سیکٹر کے کارکن عامر حسن صدیقی کو مختلف الزامات میں ملوث کرنے پر ایم کیوایم رابطہ کمیٹی کی کڑی تنقید

بے گناہ لوگوں کو گرفتار کرکے جھوٹے مقدمات قائم کرنے کا سلسلہ بند کیاجائے ، رابطہ کمیٹی ایم کیوایم 

کراچی ۔۔۔25، اکتوبر2013ء 

متحدہ قومی موومنٹ کی رابطہ کمیٹی نے ایم کیوایم لانڈھی سیکٹر یونٹ 84کے کارکن عامر حسن صدیقی ولد اویس حسن صدیقی کو مختلف الزامات میں ملوث کرنے پر کڑی تنقید کی ہے اور کہا ہے کہ بے گناہ افراد کو جھوٹے الزامات میں گرفتار کرنے سے آپریشن کے مطلوبہ اہداف ہرگز حاصل نہیں کئے جاسکتے ۔ ایک بیان میں رابطہ کمیٹی نے کہاکہ عامر حسن صدیقی کو لانڈھی کے علاقے 36-Bمیں واقع ان کے گھر سے 19اکتوبر کو صبح 5:30بجے گرفتار کیا گیا تھا ، گرفتاری کے بعد سے عامر حسن صدیقی کے بارے میں کوئی معلومات حاصل نہیں ہوسکیں، ان کے گھروالوں نے عامر حسن صدیقی کی بازیابی کیلئے22اکتوبر2013ء کو سندھ ہائیکوٹ میں ایک پٹیشن بھی داخل کی ہے ۔ رابطہ کمیٹی نے کہاکہ عامر حسن صدیقی کی گرفتاری 25اکتوبر کو میڈیا پر ظاہر کرنا اور ان کو مخٹلف الزامات میں ملوث کرنا ان خدشات کو تقویت دیتا ہے کہ آپریشن کے دوران آئینی اور قانونی تقاضے پورے نہیں کئے جارہے ہیں ۔ رابطہ کمیٹی نے کہاکہ آپریشن کے مثبت نتائج کے لئے ضروری ہے کہ قانون پر سختی سے عملدر آمد کیاجائے اور بے گناہ لوگوں کو گرفتار کرکے ان پر جھوٹے مقدمات قائم کرنے کا سلسلہ بندکیاجائے ۔