شہید ملت خان لیاقت علی خان کی زندگی پاکستان سے سچی محبت اور عقیدت کا عملی نمونہ ہے، الطاف حسین

لندن۔۔۔16، اکتوبر2013ء

متحدہ قومی موومنٹ کے قائد جناب الطاف حسین نے کہا ہے کہ شہید ملت خان لیاقت علی خان کی زندگی پاکستان سے سچی محبت اور عقیدت کا عملی نمونہ ہے اور شہید نے پاکستان کے قیام کیلئے جو قابلِ فراموش قربانیاں دیں اس سے ثابت ہوتا ہے کہ وہ وفا اور خلوص کے پیکر بھی تھے ۔شہید ملت خان لیاقت خان کی 62ویں برسی کے موقع پر اپنے خصوصی بیان میں انہوں نے کہا کہ شہید ملت خان لیاقت خان پاکستان کو اس کے خوابوں کی تعبیر دیکر ترقی یافتہ ممالک کی صفوں میں شامل کرنا چاہتے تھے لیکن یہ ملک و قوم کی بدقسمتی رہی کہ انہیں راولپنڈی کے ایک جلسے میں گھناؤنی سازش کے تحت بیدردی سے شہید کردیا گیا ۔ انہوں نے کہا کہ پاکستان کے پہلے وزیراعظم شہید ملت خان لیاقت خان کی قربانی رائیگاں نہیں جائے اور پاکستان میں غریب و متوسط طبقہ کی قیادت کا انقلاب ضرور آئے گا ۔ انہوں نے کہاکہ ملک و قوم کا المیہ یہ ہے کہ شہید ملت خان لیاقت خان کے قتل کی واردات کے اصل اسباب پر آج تک پردہ پڑا ہوا ہے اور اس کے پس پردہ حقائق سے عوام آج بھی ناواقف ہیں ۔جناب الطاف حسین نے شہید ملت خان لیاقت علی خان کو زبردست خراج عقیدت پیش کیا اور وزیراعظم نواز شریف سے مطالبہ کیا کہ شہید خان لیاقت خان کے قتل کے اسباب اور اس کی تحقیقات عوام کے سامنے لائی جائے۔