ضلع گھوٹکی کے شہر اوباڑو میں دو بہنوں کے ساتھ پولیس اہلکاروں کی اجتماعی زیادتی کے واقعے پر رابطہ کمیٹی کا اظہار مذمت

کراچی۔۔۔13، اکتوبر2013ء 

متحدہ قومی موومنٹ کی رابطہ کمیٹی نے ضلع گھوٹکی کے شہراوباڑو میں دوبہنوں کے ساتھ پولیس اہلکاروں کی جانب سے اجتماعی زیادتی کے واقعے کی سخت ترین الفاظ میں مذمت کی ہے اور مطالبہ کیا کہ مکمل تحقیق کے بعد ملو ث پولیس اہلکاروں کے خلاف سخت کاروائی عمل میں لائی جائے۔ رابطہ کمیٹی نے کہا کہ معصوم بچیوں اور خواتین کے ساتھ ہونیوالے جنسی تشدد کے واقعات کی روک تھام کے لئے ضروری ہے کہ مجرموں کو گرفتار کرکے قانون کے مطابق کڑی سے کڑی سزائیں دی جائیں، انہوں ںے کہاکہ پولیس کا بنیادی مقصد عوام کو تحفظ اور انصاف فراہم کرنا ہوتا ہے اور اگر قانون کے محافظ ہی ظلم اوزیادتی پر اتر آئیں تو عام لوگوں کا پر سان حال کون ہوگا؟ ۔ رابطہ کمیٹی نے گورنر سندھ ڈاکٹر عشرت العباد ، وزیر اعلی سندھ سید قائم علی شاہ اور وفاقی وزیر داخلہ چوہدری نثار علی خان سے مطالبہ کیا ہے کہ ضلع گھوٹکی میں اجتماعی زیادتی کے اس واقعے کا نوٹس لیا جائے اور ملوث اہلکاروں کے خلاف سخت سے سخت کاروائی کی جائے۔