عید الاضحیٰ کے موقع پر شہر میں ٹریفک جام کی صورتحال بد ترین شکل اختیار کرچکی ہے، حق پرست اراکین صوبائی اسمبلی

کراچی ۔۔۔13اکتوبر 2013ء 

متحدہ قومی موومنٹ کے حق پرست اراکین صوبائی اسمبلی نے عید الاضحیٰ کے موقع پر کراچی میں ٹریفک جام کے باعث شہریوں کو لاحق مشکلات اور پریشانیوں پر گہری تشویش کااظہار کیا ہے ۔ اپنے مشترکہ بیان میں انہوں نے کہا کہ شہر میں عید الاضحیٰ کے موقع پرحکومت اور انتظامیہ کی جانب سے ٹریفک کی روانی برقرار رکھنے اور ٹریفک جام کی صورتحال سے نمٹنے کیلئے کسی قسم کے مثبت اقدامات نہیں کئے گئے جس کے باعث شہر میں ٹریفک جام کی صورتحال بد ترین شکل اختیار کرچکی ہے ۔ انہوں نے کہا کہ عید الاضحی مسلم امہ کا بڑا مذہبی تہوار ہے اور اس تہوار میں جگہ جگہ مویشی منڈیوں کے قیام ، قربانی کے جانوروں کی خرید و فروخت اور عید الاضحیٰ کی تیاریوں کیلئے شہری بڑی تعداد میں باہر نکلتے ہیں اور جب انہیں شہر میں کئی کئی گھنٹے ٹریفک جام کی سنگین صورتحال کا سامنا کرنا پڑتا ہے تو ان کے غم و غصہ کو کوئی بھی ذی شعور شخص غلط قرار نہیں دے سکتا ۔ حق پرست اراکین صوبائی اسمبلی نے گورنر سندھ ڈاکٹر عشرت العباد اور وزیراعلیٰ سندھ سید قائم علی شاہ سے مطالبہ کیا کہ شہر میں عید الاضحی کے موقع ٹریفک جام کی بد ترین صورتحال کا سنجیدگی سے نوٹس لیاجائے اور شہریوں کو ٹریفک جام کے عذاب سے نجات کیلئے فی الفور مثبت اور عملی اقدامات بروئے کار لائے جائیں ۔