ڈیفنس میں معصوم طالبہ کے ساتھ زیادتی کے واقعہ کا فوری نوٹس لیا جائے اور واقعہ میں ملوث درندہ صفت عناصر کو فی الفور گرفتارکیا جائے، اے پی ایم ایس او
شہر بھر میں ٹارگٹڈ آپریشن کے باوجود معصوم بچیوں کے ساتھ درندگی کے سفاکانہ واقعات کا رونماء ہونا سوالیہ نشان ہے
کراچی:۔۔12 ؍اکتوبر 2013
آل پاکستان متحدہ اسٹوڈینٹس آرگنائزیشن شعبہ طالبات نے کراچی کے علاقے ڈیفنس میں طالبہ کے ساتھ زیادتی کی سخت ترین الفاظ میں مذمت کا اظہار کرتے ہوئے واقعہ کے مرتکب درندہ صفت عناصر کے خلاف سخت قانونی کاروائی کا مطالبہ کیا ہے۔ ایک بیان میں انہوں نے کہا کہ شہر بھر میں جرائم پیشہ عناصر کے خلاف ٹارگٹڈ آپریشن کیا جارہا ہے اس کے باوجود معصوم بچوں اور بچیوں کے ساتھ درندگی کے سفاکانہ واقعات کا رونماء ہونا سوالیہ نشان اور باعث تشویش ہے ۔ انہوں نے کہا کہ تسلسل کے ساتھ رونماء ہونے والے زیادتی کے واقعات سے طلبہ و طالبات میں شدید خوف و ہراس و بے چینی پائی جارہی ہے جبکہ ان کے والدین شدید اضطرابی کیفیت میں مبتلا ہیں۔ لہٰذا زیادتی میں ملوث افراد کسی رعایت کے مستحق نہیں ہیں۔ آل پاکستان متحدہ اسٹوڈینٹس آرگنائزیشن صدر پاکستان ممنون حسین ، وزیراعظم پاکستان میاں محمد نوازشریف، وفاقی وزیر داخلہ چوہدری نثار علی خان، گورنر سندھ ڈاکٹر عشرت العباد خان، وزیراعلیٰ سندھ سید قائم علی شاہ، سے مطالبہ کیا ہے کہ وہ معصوم طالبہ کے ساتھ زیادتی کا فوری نوٹس لیں اور اس واقعہ میں ملوث مجرمان کو فی الفور گرفتار کرکے قرار واقعی سزا دی جائے اور طالبہ کو جانی و مالی تحفظ فراہم کی جائے۔