کراچی کی بجلی کی کٹوتی سے متعلق وفاقی وزیر مملکت برائے پانی و بجلی عابد شیر علی کے بیانات افسوسناک ہیں، خواجہ اظہار الحسن

کراچی:۔08؍ اکتوبر2013ء 

سندھ اسمبلی میں متحدہ قومی موومنٹ کے ڈپٹی پارلیمانی لیڈر خواجہ اظہار الحسن نے وفاقی وزیر مملکت برائے پانی و بجلی عابد شیر علی کے بیان کی شدید مذمت کرتے ہوئے کہا کہ نیشنل گرڈ سے کراچی کو ملنے والی بجلی کی کٹوتی کراچی کو اندھیرے میں دھکیلنے کے مترادف ہے۔ انہوں نے کہا کہ کراچی کو نیشنل گرڈ سے ایک معاہدے کے تحت صرف 650میگاواٹ بجلی ملتی ہے جو کہ کل ملکی پیداوار کا 4سے 5فیصد ہے۔ خواجہ اظہار الحسن نے کہا کہ کراچی کی بجلی کی کٹوتی کے حوالے سے اس قسم کے بیانات افسوسناک ہیں اور کراچی کے بارے میں ایک مخصوص تعصب کو ظاہر کرتی ہیں ۔ انہوں نے کہا کہ بجلی کی ملکی پیداوار پر کراچی کے شہریوں کا اتنا ہی حق ہے جتنا ملک کے کسی دوسرے حصے کے شہریوں کا ہے ۔ خواجہ اظہار الحسن نے کہا کہ کراچی پاکستان کی معیشت کے لئے شہ رگ کی حیثیت رکھتا ہے اور ملکی ترقی کے لیے ضروری ہے کہ کراچی کے شہرکے ساتھ امتیازی سلوک بند کی جائے۔