اساتذہ کا دل سے احترام اور انہیں جائز مقام دیکر ہی قومیں ترقی و خوشحالی کی منازل طے کرسکتی ہیں، الطاف حسین

لندن۔۔۔5، اکتوبر2013ء 

متحدہ قومی موومنٹ کے قائد جناب الطاف حسین نے کہا ہے کہ اساتذہ کا دل سے احترام اور انہیں جائز مقام دیکر ہی قومیں ترقی و خوشحالی کی منازل طے کرسکتی ہیں اورمہذب و ترقی یافتہ ممالک میں اساتذہ قیمتی سرمایہ تصور کئے جاتے ہیں ۔’’استاد‘‘ کے عالمی دن کے موقع پر اپنے خصوصی بیان میں انہوں نے کہاکہ اساتذہ کاعمل و کردار اور ان کی تربیت قوموں کے مستقبل کو سنوارتی ہیں اور اساتذہ کی جانب سے قوم کے معماروں کو علم کی جیسی دولت سے آراستہ کرناکامیابی و کامرانی کی ضمانت ہے ۔جناب الطاف حسین نے ’’استاد‘‘ کے عالمی دن کے موقع پر تمام اساتذہ کرام کو دلی مبارکباد پیش کرتے ہوئے ایم کیوایم کے کارکنان ، حق پرست عوام اور ایک ایک پاکستانی سے اپیل کی کہ وہ اساتذہ کرام کا دل سے احترام کریں اور ان کی عزت کریں کیونکہ اساتذہ کرام ملک و قوم کا قیمتی اثاثہ ہیں اور قوموں کی ترقی و خوشحالی اور مہذب معاشرے کا قیام اساتذہ کرام کو ان کا جائز مقام دیئے بغیر ممکن نہیں ہے ۔