کے ای ایس سی کی جانب سے کراچی کے شہریوں کو بجلی کی طویل دورانیہ کی لوڈشیڈنگ سے جلد از جلد نجات دلائی جائے، حق پرست اراکین قومی اسمبلی

کراچی :۔۔4؍ اکتوبر 2013ء

متحدہ قومی موومنٹ کے حق پرست اراکین قومی اسمبلی نے کراچی الیکٹرک سپلائی کارپوریشن کی جانب سے شہر میں مختلف جگہوں پر طویل دورانیہ کی لوڈ شیڈنگ کی سخت ترین الفاظ میں مذمت کی ہے اور سوئی سدرن گیس کمپنی سے مطالبہ کیا ہے کہ شہر میں بجلی کی لوڈ شیڈنگ کے خاتمے کیلئے کے ای ایس سی کو مطلوبہ مقدار میں گیس کی فراہمی کو یقینی بنائی جائے ۔اپنے مشترکہ بیان میں انہوں نے کہا کہ عوام پہلے ہی کے ای ایس سی کے نظام کے باعث ، غیر اعلانیہ اور طویل دورانیہ کی لوڈ شیڈنگ کا عذاب جھیل رہے ہیں اور اس پر ستم برائے ستم یہ ہے کہ سوئی سدرن گیس کی جانب سے کے ای ایس سی کو مطلوبہ مقدار میں گیس فراہم نہیں کی جارہی ہے اور گیس کی عدم فراہمی کا بہانہ کرکے کے ای ایس کی طرف سے شہر میں تین ، تین گھنٹے دورانیہ کی تین مرتبہ مزید لوڈ شیڈنگ کی جارہی ہے جس کی جتنی بھی مذمت کی جائے وہ کم ہے ۔ انہوں نے کہا کہ کے ای ایس سی اور سوئی سدرن گیس کی جانب سے اپنے آپس کے معاملات میں شہریوں پر بجلی کی لوڈ شیڈنگ کا عذاب مسلط کرنا ظلم ہے ۔ انہوں نے مزید کہا کہ شہر کراچی ملک کی معاشی ترقی کا محور ہے اور شہریوں بجلی گیس اور بنیادی سہولیات کے فراہمی کے اداروں کو اب اپنی بنیادی ذمہ داری کا احساس کرنا ہوگا اور اپنے مفادات کی خاطر کروڑوں عوام کو شدید گرمی کے موسم میں اذیت اور ذہنی کرب میں مبتلاکرنے کا سلسلہ فوری بند کردے عمل فی الفور بند کردینا چاہئے ۔ حق پرست اراکین قومی اسمبلی نے وزیراعظم نوازشریف ،وفاقی وزیر پانی و بجلی خواجہ آصف اور وزیراعلیٰ سندھ سید قائم علی شاہ سے مطالبہ کیا کے ای ایس سی اور سوئی سدرن گیس کمپنی کی جانب سے اداروںآپس کے معاملات میں شہرویوں پر بجلی کی لوڈ شیڈنگ کا عذاب مسلط کرنے کا سنجیدگی سے نوٹس لیا جائے اور شہریوں کو بجلی کی طویل دورانیہ کی لوڈ شیڈنگ سے جلد از جلد نجات دلائی جائے۔