پی آئی اے کے مستقبل کے فیصلے میں ادارے کے دیرینہ ملازمین کے مفاد کو اولین ترجیح دی جائے، الطاف حسین

لندن۔۔۔30، ستمبر2013ء

متحدہ قومی موومنٹ کے قائد جناب الطاف حسین نے مطالبہ کیا ہے کہ پی آئی اے کے مستقبل کافیصلہ کرتے وقت ادارے کے دیرینہ ملازمین کے مفاد کو اولین ترجیح دی جائے اورادارے کے ملازمین کے مکمل اعتماد کے ساتھ پی آئی اے کی آئندہ پالیسی وضح کی جائے۔ ایک بیان میں جناب الطاف حسین نے کہاکہ ایسی اطلاعات موصول ہورہی ہیں کہ پی آئی اے کی مکمل یا جزوی طور پر نجکاری کی جارہی ہے، یہ اطلاع ادارے کے ملازمین پر آسمانی بجلی کی طرح گری ہے اور ان کے دن چین اور رات کا سکون غارت ہوگیا ہے۔ پی آئی اے کی نجکاری کی اطلاع سے ادارے کے ملازمین میں گہری تشویش پائی جاتی ہے کہ کہیں ان کی برسوں کی ملازمت نجکاری کی نذرنہ ہوجائے اور ان کی زندگی بھر کی ریاضت تباہی کا شکارنہ ہوجائے ۔ جناب الطاف حسین نے کہاکہ حکومت ،خسارے کا شکارسرکاری اداروں کو منافع بخش اور ان کی کارکردگی کو بہتر بنانے کیلئے جوبھی مثبت حکمت عملی وضح کرے گی ، ایم کیوایم اس کی حمایت کرے گی تاہم ایسے اداروں کے دیرینہ ملازمین کے معاشی مستقبل کا ہرصورت میں تحفظ کیاجانا چاہئے۔ جناب الطاف حسین نے وزیراعظم پاکستان میاں محمد نوازشریف اور پی آئی اے کے پالیسی میکرز سے کہاکہ وہ پی آئی اے کے مستقبل کے حوالہ سے جو بھی پالیسی بنائیں اس میں ادارے کے مفاد کے ساتھ ساتھ ملازمین کے مفاد کو اولین ترجیح دیں تاکہ نجکاری کے عمل سے گزرنے والے ادارے کے ملازمین بھی خوشحال ہوں اور وہ ادارہ بھی ترقی پائے۔