ایم کیوایم خیبرپختونخوا کے ذمہ داران اور کارکنان بم دھماکوں کے زخمیوں کی عیادت کریں، الطاف حسین

لندن۔۔۔29، ستمبر2013ء

متحدہ قومی موومنٹ کے قائد جناب الطاف حسین نے ایم کیوایم صوبہ خیبرپختونخوا کے تمام ذمہ داران اور کارکنان کو ہدایت کی ہے کہ وہ پشاور میں بم دھماکوں کے زخمیوں کی عیادت کریں اور متاثرین کی ہرممکنہ مدد کریں۔ ایک بیان میں جناب الطاف حسین نے کہاکہ آج صبح پشاور کے قصہ خوانی بازار میں یکے بعد دیگر بم دھماکوں میں درجنوں افراد شہید ہوچکے ہیں جبکہ 70 سے زائد زخمی افرادپشاور کے مختلف اسپتالوں میں زیرعلاج ہیں ۔ جناب الطاف حسین نے خیبرپختونخوا بالخصوص پشاور میں ایم کیوایم کے ذمہ داران ، کارکنان اور ہمدردوں سے اپیل کی کہ وہ دکھ کی اس گھڑی میں سانحہ کے متاثرین کو تنہا نہ چھوڑیں اور ان کی بحالی کیلئے جاری سرگرمیوں میں تعاون کریں۔ایم کیوایم کے ذمہ داران اور کارکنان لیڈی ریڈنگ اسپتال اور دیگر اسپتالوں کا دورہ کرکے بم دھماکے کے زخمیوں کی عیادت کریں ، زخمیوں کی زندگیاں بچانے کیلئے خون کے عطیات دیں اور بم دھماکے کے متاثرین کی ہرممکنہ مدد کریں۔