ایم کیوایم کی امدادی ٹیم کے وفد نے خدمت خلق فاؤنڈیشن کی جانب سے ایک ٹرک امدادی سامان آواران کے متاثرین میں تقسیم کیا

بلوچستان۔۔۔27، ستمبر2013ء 

متحدہ قومی موومنٹ کے قائد جناب الطاف حسین کی خصوصی ہدایت پر صوبائی تنظیمی کمیٹی کے انچارج واراکین جنت گل کاکڑ، اکبر مینگل نے کوئٹہ زون کے انچارج پیرجان سمالانی اور کے ایم سی ماڑی پور سیکٹر انچارج عبد القادر بلوچ، جوائنٹ انچارج عامر بلوچ کے ہمراہ خدمت خلق فاؤنڈیشن کی جانب سے ایک ٹرک امدادی سامان بلوچستان کے ضلع آواران میں زلزلہ زدگان میں تقسیم کیا۔ امدادی سامان میں غذائی اجناس آٹا، چاول، دالیں، مصالحہ جات، گھی، تیل، شکر، نمک، خشک دودھ، چائے کی پتی، ٹینٹ، کولر اور بالٹیوں سمیت ضروریات زندگی کی دیگر امدادی اشیاشامل تھی جن کی مالیت لاکھوں روپے ہے۔اس موقع پرمتاثرین نے قائدتحریک الطاف حسین کی جانب سے امدادی سامان کی تقسیم پر جناب الطاف حسین، ایم کیوایم اور خدمت خلق فاؤنڈیشن کا شکریہ ادا کیا اور کہا کہ ابھی تک کسی اور سیاسی ومذہبی جماعت کی جانب سے کوئی بھی امدادی سامان آواران نہیں پہنچاایم کیوایم واحدجماعت ہے جس کی جانب سے پہلے امدادی سامان متاثرین تک پہنچایا گیا ہے۔ انہوں نے ایم کیوایم کے نمائندوں سے طبّی امدادی کیمپ کے قیام کیلئے اپیل بھی کی۔