نبیل گبول کے خلاف قتل کے مقدمہ کا اندراج سندھ حکومت کی ایک اور بد ترین انتقامی کاروائی ہے، حق پرست سینٹرز

کراچی ۔۔۔21، ستمبر2013ء

متحدہ قومی موومنٹ کے حق پرست سینیٹرز نے کہا ہے کہ ایم کیوایم کے رکن قومی اسمبلی نبیل گبول کے خلاف قتل کے مقدمہ کا اندراج پیپلز پارٹی کی سندھ حکومت کی ایک اور بد ترین سیاسی انتقامی کارروائی ہے جس نے جمہوریت کا لبادہ اوڑھے ہوئے نام نہاد سیاسی رہنماؤں کو بے نقاب کردیا ہے۔ اپنے مشترکہ بیان میں انہوں نے کہاکہ سابق حق پرست رکن صوبائی اسمبلی ندیم ہاشمی کو قتل کے جھوٹے مقدمے میں گرفتار کرنے کے بعد اب ایم کیوایم کے رکن قومی اسمبلی نبیل گبول کے خلاف قتل کا مقدمہ درج کرنا ایم کیوایم کے خلاف گھناؤنی سازشوں کا تسلسل ہے۔ انہوں نے کہاکہ ایک جانب ٹارگٹڈ آپریشن کے نام پر ایم کیوایم کے سینکڑوں بے گناہ کارکنان کو گرفتار کیا جارہا ہے اور دوسری جانب حق پرست عوامی نمائندوں پر قتل جیسے سنگین جھوٹے مقدمات قائم کرکے ایم کیوایم کی شکل دنیا بھر میں خراب کی جارہی ہے جس کی جتنی بھی مذمت کی جائے وہ کم ہے ۔ انہوں نے کہا کہ ایم کیوایم کے خلاف سازشوں میں مصروف عناصر یہ جان لیں کہ ایم کیوایم ایک مسلمہ عوامی قوت ہے اور اس کھلی حقیقت اور زمینی حقائق سے نظریں چرانے والے دراصل ایم کیوایم کے بڑھتے ہوئے عوامی مینڈیٹ سے خوفزدہ ہیں اور اب ایم کیوایم کو طاقت کا ناجائز استعمال کرکے سیاسی اور جمہوری حقوق سے محروم رکھنا چاہتے ہیں ۔ انہوں نے کہاکہ ایم کیوایم عوامی قوت ہے لیکن غیر قانونی مقدمات اور گرفتاریوں کے ذریعے اس کے جمہوری اور سیاسی حقوق سلب کرنے کی پالیسی پر عمل کیاجارہا ہے اور ایم کیوایم کے تحفظات کو سرخ فیتے کی نظر کرکے ناعاقبت اندیش روش اختیار کی جارہی ہے جس کے نتائج کسی طرح بھی ملک و قوم کے مفا دمیں ہرگز نہیں ہوسکتے ۔ حق پرست سینیٹرز نے وزیراعظم پاکستان نواز شریف اور وفاقی وزیر داخلہ چوہدری نثار علی خان سے مطالبہ کیا کہ ایم کیوایم کے رکن قومی اسمبلی نبیل گبول کے خلاف قتل کے سیاسی اور انتقامی مقدمے کے اندراج کا سختی سے نوٹس لیاجائے اور قتل کا مقدمہ فی الفور واپس لیاجائے ۔