اورنگی ٹاؤن کے علاقے میں ایم کیوایم کے دو کارکنوں اور دو ہمدردوں کے بہیمانہ قتل کا واقعہ دہشت گردی اور بربریت کی بدترین مثال ہے۔ الطاف حسین

لندن ۔۔۔ 17 ستمبر2013ء

متحدہ قومی موومنٹ کے قائدجناب الطا ف حسین نے اورنگی ٹاؤن کے علاقے میں مسلح دہشت گردوں کی فائرنگ سے ایم کیوایم کے دو کارکنوں اور دو ہمدردوں کے بہیمانہ قتل کی شدیدالفاظ میں مذمت کرتے ہوئے کہا ہے کہ ایم کیوایم کے کارکنوں اورہمدردوں کے بہیمانہ قتل کا یہ واقعہ دہشت گردی اوربربریت کی بدترین مثال ہے ۔ اپنے بیان میں انہوں نے کہاکہ شہرمیں پولیس، رینجرز،ایف سی اور دیگر قانون نافذ کرنے والے ادارے موجودہیں اور شہرمیں قیام امن کیلئے ٹارگٹڈایکشن بھی کیاجارہاہے لیکن دوسری جانب شہر میں قتل اور دہشت گردی کے واقعات تسلسل کے ساتھ جاری ہیں۔انہوں نے کہاکہ دہشت گردوں نے جس دیدہ دلیری کے ساتھ اورنگی ٹاؤن میں ایم کیوایم کے کارکنوں اور ہمدردوں کو دن دہاڑے فائرنگ کرکے شہیدکیاہے اورجس طرح بربریت کے اس واقعہ میں ملوث سفاک دہشت گرد تاحال گرفتارنہیں کئے گئے ہیں اس نے شہر میں جاری ٹارگٹڈآپریشن کے بارے میں ایک سوال کھڑاکردیا ہے ۔ جناب الطا ف حسین نے صدرمملکت ممنون حسین، وزیراعظم نوازشریف اوروفاقی وزیرداخلہ چوہدری نثارسے مطالبہ کیاکہ ایم کیوایم کے کارکنوں اورہمدردوں کے بہیمانہ قتل کے اس واقعہ کافوری نوٹس لیا جائے اور ایم کیوایم کے بے گناہ کارکنوں کوگرفتارکرنے کے بجائے کھلی دہشت گردی میں ملوث دہشت گردوں کوفی الفورگرفتارکیاجائے ۔ جناب الطاف حسین نے دہشت گردی کے واقعہ میں شہیدہونے والے ایم کیوایم کے کارکنوں پرویزعالم شہید، محمدریاض شہید اورہمدردوں عبدالجبارشہید اورندیم شہید کے لواحقین سے دلی تعزیت وہمدردی کااظہارکرتے ہوئے کہاکہ اپنے کارکنوں اورہمدردوں کی شہادت کے واقعہ پر میرادل خون کے آنسو رورہاہے، مجھ سمیت ایم کیوایم کے تمام کارکنان آپ کے غم میں برابرکے شریک ہیں۔انہوں نے
دعاکی کہ اللہ تعالیٰ تمام شہداء کواپنی جواررحمت میں جگہ دے اورلواحقین کوصبرجمیل عطاکرے۔