اورنگی ٹاؤن سیکٹر کے کارکن محمد اقبال کی المناک شہادت پر جناب الطاف حسین کا اظہار افسوس
ایم کیوایم کی رابطہ کمیٹی کی جانب سے اورنگی ٹاؤن کے کارکن محمد اقبال کے قتل کی شدید الفاظ میں مذمت
شہر میں قانون نافذ کرنیوالے اداروں کی جانب سے ٹارگٹڈ آپریشن کے باوجود ایم کیوایم کے کارکنان کا قتل لمحہ فکریہ ہے، رابطہ کمیٹی
وزیراعظم، وفاقی وزیر داخلہ اور حکومت سندھ محمد اقبال کے بہیمانہ قتل کا نوٹس لیں، رابطہ کمیٹی کا مطالبہ
محمد اقبال شہید الفتح قبرستان میں سپرد خاک، نماز جنازہ اور تدفین میں رابطہ کمیٹی، منتخب نمائندوں اور دیگر ذمہ داران کی شرکت
کراچی:۔۔۔16؍ستمبر2013ء
ایم کیوایم کے قا ئد جناب الطاف حسین نے اورنگی ٹاؤن سیکٹر یونٹ 126کے کارکن محمد اقبال کی المناک شہادت پر گہرے دکھ اور افسوس کا اظہار کیا ہے ایک تعزیتی بیان میں جناب الطاف حسین نے مرحوم کے تمام سوگوار لواحقین سے دلی تعزیتی و ہمدردی کا اظہار کرتے ہوئے کہا کہ مجھ سمیت ایم کیوایم کا ایک ایک کارکن آ پ کے غم میں برابر کا شریک ہے۔ جنا ب الطاف حسین نے اللہ تعا لیٰ کے حضور دعا کی کہ اللہ تعالیٰ شہید محمد اقبال کو اپنی جوار رحمت میں اعلیٰ مقام عطا فرمائے اور سوگواروں کو یہ صدمہ برادشت کرنے کی توفیق عطا کرئے آمین ۔
دریں اثناء ایم کیوایم کی رابطہ کمیٹی نے ایم کیوایم اورنگی ٹاؤن سیکٹر یونٹ126 کے کارکن محمد اقبال کے قتل کی سخت ترین الفاظ میں مذمت کی ہے اورمطالبہ کیا ہے کہ محمد اقبال کے قتل میں ملوث دہشت گردوں کوگرفتارکرکے قانون کے مطابق سزادی جائے۔ایک بیان میں رابطہ کمیٹی نے کہاکہ قانون نافذکرنیوالے اداروں کی جانب سے کراچی میں جاری ٹارگٹڈآپریشن کے باوجوددہشت گردوں کے ہاتھوں دن دہاڑے ایم کیوایم کے کارکنان کے قتل کے واقعات لمحہ فکریہ ہیں اور اس بات کا ثبوت ہے کہ قانون نافذ کرنیوالے ادارے جرائم پیشہ عناصر کو چھوڑ کر صرف اور صرف ایم کیوایم کو نشانہ بنارہے ہیں۔ رابطہ کمیٹی نے محمداقبال شہیدکے سوگوار لواحقین سے دلی تعزیت وہمدردی کا اظہار کرتے ہوئے انہیں صبر کی تلقین کی اور دعا کہ کی اللہ تعالیٰ شہید کو اپنی جوار رحمت میں اعلیٰ مقام عطا فرمائے اور سوگواران کو صبر جمیل عطافرمائے۔رابطہ کمیٹی نے وزیراعظم پاکستان میاں محمدنوازشریف،وفاقی وزیرداخلہ چوہدری نثارعلی اورسندھ حکومت سے مطالبہ کیا کہ اورنگی سیکٹرکے کارکن محمد اقبال کے قتل کانوٹس لیا جائے اورقتل میں ملوث دہشت گردوں کوگرفتار کرکے قانون کے مطابق سزادی جائے۔
مزیدبراں ایم کیوایم اورنگی ٹاؤن سیکٹرکے کارکن محمد اقبال شہیدکوسینکڑوں سوگواروں کی آہوں اورسسکیوں کے درمیان الفتح قبرستان اورنگی ٹاؤن نمبر10میں سپردخاک کردیاگیا۔شہیدکی نمازجنازہ بعد نماز عصر جامع مسجد مدنی الصدف کالونی سیکٹر10اورنگی ٹاؤن میں اداکی گئی۔نمازجنازہ اورتدفین میں ایم کیوایم کی رابطہ کمیٹی کے رکن احمدسلیم صدیقی،حق پرست رکن سندھ اسمبلی محمد حسین، کراچی تنظیمی کمیٹی کے ارکان،اورنگی ٹاؤن سیکٹرکمیٹی ،یونٹ کمیٹیوں کے ذمہ داران وکارکنان، ہمدردوں اورشہید کے عزیزواقارب نے شرکت کی ۔