کوہاٹ میں نام نہاد جرگے کے حکم پر تین خواتین کو غیرت کے نام پر قتل کرنے کے واقعہ پر ایم کیوایم رابطہ کمیٹی کا اظہار مذمت

کراچی ۔۔۔16، ستمبر2013ء

متحدہ قومی موومنٹ کی رابطہ کمیٹی نے کوہاٹ میں نام نہاد جرگے کے حکم پر تین خواتین کو غیرت کے نام پر قتل کرنے کے واقعہ کی سخت ترین الفاظ میں مذمت کی ہے اور کہا ہے کہ خواتین کے قتل کی اس بہیمانہ واردات سے ثابت ہوگیا ہے کہ جرگوں پر عدالتی پابندی کے باوجود ملک میں نام نہاد جرگوں کا انعقاد کرکے اور اس میں فرسودہ روایت کے تحت فیصلے کرکے نہ عدالتی احکامات بلکہ آئین و قانون کی دھجیاں اڑائی جارہی ہیں ۔ایک بیان میں رابطہ کمیٹی نے کہاکہ ملک میں نام نہاد جرگوں کا انعقا داور اس میں خود ساختہ روایت کے تحت فیصلے اور سزائیں دینا انصاف کے تقاضوں کے مکمل منافی ہے اور جرگوں کا انعقاد کرکے سزائیں سنانے والے نام نہاد لوگ اپنی فرسودہ روایت کے اسیر بن چکے ہیں اور ان کی جانب سے عدالتی احکامات کے باوجود جرگے منعقد کرکے انصاف کے تقاضے پورے کئے بغیر معصوم خواتین اور لوگوں کو زندگیوں سے محروم کیاجارہا ہے جس کی جتنی بھی مذمت کی جائے وہ کم ہے ۔رابطہ کمیٹی نے غیرت کے نام پر قتل کی گئی مقتول خواتین کے سوگوار لواحقین سے دلی تعزیت وہمدردی کااظہا رکیا اور سوگوارا ن کو صبرجمیل کی تلقین کی ۔ رابطہ کمیٹی نے وزیراعظم نواز شریف اور وفاقی وزیر داخلہ چوہدری نثار علی خان سے مطالبہ کیا کہ کوہاٹ میں جرگے کے حکم اور غیر ت کے نام پر تین خواتین کے بہیمانہ قتل کی واردات کا سختی سے نوٹس لیاجائے اور اس میں ملوث تمام افراد کو فی الفور گرفتار کرکے آئین و قانون کے مطابق سخت سزائیں دی جائیں ۔