لاہور میں معصوم سنبل کو زیادتی کا نشانہ بنانے کے واقعہ پر رابطہ کمیٹی کا اظہار مذمت

کراچی ۔۔۔۔13ستمبر2013ء

متحدہ قومی مومنٹ کی رابطہ کمیٹی نے لاہور میں درندہ صفت عناصر کی جانب سے معصوم سنبل کو زیادتی کا نشانہ بنانے پر شدید الفاظ میں مذمت کا اظہار کر تے ہوئے واقعہ کو درندگی وبربریت کا عمل قرار دیا ہے۔ ایک بیان میں رابطہ کمیٹی نے پنجاب میں خواتین اور معصوم بچیوں کے ساتھ ہونے والے زیادتی کے بڑھتے ہوئے واقعات پر تشویش کا اظہار کرتے ہوئے کہاکہ جوعناصر معصوم بچیوں اور خواتین کو اپنی ہوس کا نشانہ بنا رہے ہیں وہ کسی بھی قسم کی رعایت کے مستحق نہیں ہیں۔ انہوں نے صدر پاکستان ممنون حسین، وزیر اعظم میاں نواز شریف، وفاقی وزیر داخلہ چوہدری نثار، وزیر اعلی پنجاب شہباز شریف،سے مطالبہ کیا ہے کہ پنجاب میں خواتین اور معصوم بچیوں کے ساتھ ہونے والے ظلم و بربریت کے واقعات کی روک تھام کیلئے ٹھوس اور مثبت اقدامات کیے جائیں اور لاہور میں معصوم سنبل کو درندگی کا نشانہ بنانے والے سفاک عناصر کو فی الفور گرفتار کر کے قرار واقعی سزا دی جائے۔ انہوں نے گھناؤنے واقعہ میں زخمی ہونے والی معصوم بچی سنبل کی جلد و صحت یابی کیلئے دعا بھی کی۔