بانیان پاکستان کی اولادوں کو مٹانے کی کوششیں کرنا پاکستان کے خلاف سازش ہے، مرکزی رہنما ایم کیوایم ڈاکٹر خالد مقبول صدیقی

کراچی ۔۔۔22، مئی 2016ء 

متحدہ قومی موومنٹ کے زیراہتمام پی ایس 117کے ضمنی انتخابات کے سلسلے میں انتخابی مہم جوش و خروش کے ساتھ جارہی ہے۔ انتخابی مہم کے سلسلے میں گزشتہ روز پی آئی بی کالونی 8-A بس اسٹاپ کے علاقے میں ایک بڑی کارنر میٹنگ منعقد کا انعقاد کیا گیا جس میں علاقے کے نوجوانوں، بزرگوں اور خواتین نے بہت بڑی تعداد میں شرکت کی اور نامزد حق پرست امیدوار برائے پی ایس 117 میجر (ر) قمر عباس کی نامزدگی کا خیر مقدم کرتے ہوئے انہیں 02 جون کو بھاری اکثریت سے ووٹ دیکر کامیاب کرانے کی یقین دہانی کرائی۔ کارنر میٹنگ سے ایم کیوایم کے مرکزی رہنما ڈاکٹر خالد مقبول صدیقی ، حق پرست رکن قومی اسمبلی علی رضا عابدی، حق پرست رکن سندھ اسمبلی عامر معین اور نامزد حق پرست امیدوار میجر (ر) قمر عباس نے خطاب کیا جبکہ اس موقع پر ایم کیوایم سینٹرل ایگزیکٹو کونسل کے اراکین بھی موجود تھے ۔ کارنر میٹنگ کے شرکاء سے خطاب کرتے ہوئے ڈاکٹر خالد مقبول صدیقی نے کہاکہ باطل پرست ایک با پھر کراچی کی طاقت کو ٹکڑوں میں تقسیم کرنا چاہتے ہیں اور اس مقصد کیلئے یہاں لوگوں کے ضمیر خریدے جارہے ہیں لیکن پی آئی بی کالونی کے عوام 2جون 2016ء کو ہونے والے ضمنی الیکشن میں اپنے ضمیر کا فیصلہ ووٹ سے کردیں گے ۔ انہوں نے کہاکہ ہم بانیان پاکستان کی اولادوں ہیں ، ہمیں مٹانے کی کوششیں کرنا پاکستان کے خلاف سازش ہے ۔ انہوں نے کہاکہ سندھ دو حصوں میں تقسیم ہوچکا ہے ایک سندھ وہ ہے جس پر وڈیروں کا قبضہ ہے جبکہ دوسرا متروکہ سندھ ہے جس پر ہمارا حق ہے ، ہم ہندوستان سے بھاگ کر نہیں آئے تھے بلکہ ایک عالمی معاہدے کے تحت پاکستان چلانے کیلئے آئے تھے ۔ انہوں نے کہاکہ پی آئی بی کالونی کے عوام جانتیہ یں کہ حق پرست کون ہے اور ووٹ کسے دینا ہے اور2جون کے دن الیکشن میں حق پرست امیدوار کی کامیابی نئے صوبے کا ریفرنڈم ہوگا ۔ کارنر میٹنگ سے خطاب کرتے ہوئے حق پرست رکن قومی اسمبلی علی رضا عابدی نے کہا کہ کراچی اور اس کے عوام کے ساتھ ناانصافی اور زیادتی کا اندازہ اس بات سے لگایا جاسکتا ہے کہ 5دسمبر 2015ء کو بلدیاتی الیکشن ہوئے اور ابھی تک میئر کے انتخاب کیلئے الیکشن نہیں کرایاجارہا ہے ، حکومت سندھ میئر کے اختیارات اور وسائل پر قبضہ برقرار رکھ کر اپنی من مانیاں ،کرپشن اور اقرباء پروری اور غیر قانونی و غیر آئینی اقدامات کو ڈھٹائی کے ساتھ جاری رکھے ہوئے ہیں لیکن اس پر ارباب اختیار و اقتدار نے خاموشی اختیار کرلی ہے ۔ کارنر میٹنگ سے خطاب کرتے ہوئے نامزد حق پرست امیدوار میجر (ر) قمر عباس نے کہاکہ کراچی میں گزشتہ مہینوں ہونے والے ہر ضمنی الیکشن میں قائد تحریک جناب الطاف حسین کے نامزد امیدواروں کو عوام نے تمام تر جھوٹے اور منفی پروپیگنڈوں کے باوجود بھاری اکثریت سے ووٹ دیکر کامیاب بنایا ہے اور اس کامیابی کا راز یہ ہے کہ جناب الطاف حسین نے ہمیشہ محبت پھیلائی ہے اور عوام کے مسائل کو حل کیا ہے ۔ انہوں نے کہاکہ سندھ حکومت کھلی کراچی دشمنی کا مظاہرہ کررہی ہے اور کراچی کے عوام ،بلدیاتی نظام اور اس کے منتخب نمائندوں کو عضوئے معطل بنا رکھا ہے جس سے شہریوں کے مسائل اور مشکلات میں حد درجہ اضافہ ہورہا ہے اور لوگ حکومت سندھ کو لعن طعن کررہے ہیں لیکن حکومت سندھ مجرمانہ خاموشی اختیار کرکے اور کراچی کے ساتھ ناانصافیاں روا رکھ کر ایک نیا عالمی ریکارڈ قائم کرکے جاگیرداروں اور وڈیروں کو اپنی حکمرانی کا تحفہ دینا چاہتی ہے۔ 





تصاویر