صدر آصف علی زرداری اورایم کیوایم کے قائد جناب الطاف حسین سے ٹیلی فون پربات چیت

لندن ۔۔۔7، ستمبر2013ء

صدرپاکستان جناب آصف علی زرداری نے ایم کیوایم انٹرنیشنل سیکریٹریٹ لندن فون کرکے متحدہ قومی موومنٹ کے قائد جناب الطاف حسین سے ٹیلی فون پربات چیت کی اوراپنے دورصدارت کے دوران جناب الطاف حسین اور ایم کیوایم کے تعاون پر انکا شکریہ ادا کیا۔ ہفتہ کی شب جناب الطاف حسین سے گفتگو کرتے ہوئے صدرآصف علی زرداری نے کہاکہ آج میرا ایوان صدر میں آخری دن ہے ، آپ کی دعا اورتعاون سے ہم صدر بنے اور اللہ تعالیٰ کے فضل وکرم سے عزت کے ساتھ رخصت ہورہے ہیں۔ صدرآصف علی زرداری نے عرصہ صدارت کے دورن ایم کیوایم کے بھرپور تعاون پر جناب الطاف حسین کا شکریہ ادا کرتے ہوئے کہا کہ مستقبل میں بھی ایم کیوایم سے رابطے جاری رہیں گے۔ جناب الطاف حسین نے صدرآصف علی زرداری سے گفتگو کرتے ہوئے انہیں انکے عہدہ صدارت کی تکمیل پر مبارکباد پیش کی اور دعا کی کہ اللہ تعالیٰ آئندہ بھی اسی قسم کی کامیابیوں سے آپ کو ہمکنارکرے ۔ انہوں نے کہاکہ ملک کیلئے یہ بڑے اعزاز کی بات ہے کہ پاکستان کی 66 سالہ تاریخ میں پہلی مرتبہ جمہوری حکومت اور صدارتی منصب نے اپنی مدت پوری کی ہے ۔ انہوں نے کہاکہ جمہوریت کے فروغ کیلئے تمام جماعتوں نے اپنی اپنی بساط کے مطابق تعاون کیا لیکن جہاں تک ایم کیوایم اورالطاف حسین کاتعلق ہے تو ہم آخری وقت تک چٹان کی طرح آپکے ساتھ کھڑے رہے ۔ جناب الطاف حسین نے صدرمملکت سے کہاکہ آپ صدارت کے منصب سے سبکدوش ہونے کے بعد ملک بالخصوص سندھ میں اتحاد ویکجہتی کیلئے اپنی صلاحیتیں استعمال کریں۔صدرزرداری نے جناب الطاف حسین کو یقین دلایا کہ وہ ملک خصوصاً سندھ میں عوام کے مختلف طبقات کے درمیان اتحاد ویکجہتی اور انہیں قریب لانے کیلئے اپنی کوششیں جاری رکھیں گے ۔