ملک دشمن قوتیں ہر دور میں قائد تحریک اور ایم کیو ایم کے خلاف زہریلا پروپیگنڈا کرتی آئی ہیں اوران قوتوں کو ہردور میں شکست نصیب ہوئی ہے،حق پرست ارکان قومی اسمبلی

کراچی۔۔۔7ستمبر2013ء

متحدہ قومی موومنٹ کے حق پرست ارکان قومی اسمبلی نے اپنے بیان میں گزشتہ روز امریکی سفارتخانے کی جانب سے اسلحہ سے بھرے 19ہزار کنٹینرز کے چوری ہونے کے تردیدی بیان پر تبصرہ کرتے ہوئے کہا ہے کہ ملک دشمن قوتیں ہر دور میں قائد تحریک اور ایم کیو ایم کے خلاف زہریلا پروپیگنڈا کرتی آئی ہیں لیکن ان قوتوں کو ہردور میں شکست نصیب ہوئی ہے۔ انہوں نے کہا کہ حق پرست سینیٹر بابر خان غوری پر جھوٹا اور بے بنیاد الزام اُن تمام الزامات کی کڑی ہے جو قائد تحریک اور ایم کیو ایم پر لگتے آئے ہیں لیکن اللہ تعالیٰ نے ہمیشہ ہماری مدد فرمائی ہے اور دنیا نے دیکھا ہے کہ الزامات لگانے والے ہی شرمندہ ہوئے ہیں۔انہوں نے کہا کہ ماضی میں بھی ایم کیوایم کے خلاف جھوٹے ،من گھڑت اوربے بنیاد الزامات جس میں سرفہرست جناح پور کا الزام شامل تھا مگر آج،19ہزار کنٹینرز کی گمشدگی اور اب مہاجر ری پبلک لبریشن آرمی کا شوشہ چھوڑنے والے ملکی سلامتی کے دشمن اور پاکستان کے اصل مجرم ہیں۔ حق پرست ارکان اسمبلی نے کہا کہ میڈیا سے تعلق رکھنے والے چند افراد ایم کیو ایم کے خلاف ہر منفی پرو پیگنڈے کو ہوا دینے میں پیش پیش نظر آتے ہیں اورایم کیو ایم کے خلاف کسی بھی خبر کی تصدیق کئے بغیر اس پر تبصرہ صادر فرمادیتے ہیں ۔انہوں نے کہا کہ پاکستان دہشت گردی سمیت انگنت مسائل سے دوچار ہے اب وقت آگیا ہے کہ شرپسند عنا صر پاکستان کی بقاء وسلامتی کو مدنظر رکھتے ہوئے ایسے کسی منفی بیان سے گریز کریں جو کسی محب وطن تنظیم کے قائد اور اس جماعت سے منسلک ہو۔حق پرست ارکان قومی اسمبلی نے چیف جسٹس آف پاکستان جناب افتخا ر محمد چوہدری سے اپیل کی ہے کہ 19ہزار کنٹینر ز گمشدگی اور مہاجر آرمی جیسے شوشے کو چھوڑنے والے عناصر کو بے نقاب کریں اور قوم کو بتائیں کہ اس سازش کے پیچھے کونسے عوامل موجود ہیں۔