ضمنی الیکشن این اے 5نوشہرہ ، این اے 71میانوالی اور این اے 27لکی مروت میں خواتین کو ووٹ ڈالنے کے حق سے محروم رکھنے پر الطاف حسین کا اظہار مذمت

لندن۔۔۔22، اگست2013ء 

متحدہ قومی موومنٹ کے قائد جناب الطاف حسین نے ضمنی الیکشن کے دوران این اے 5نوشہرہ ، این اے 71میانوالی اور این اے 27لکی مروت میں خواتین کو ووٹ ڈالنے کے حق سے محروم رکھنے کی سخت ترین الفاظ میں مذمت کی ہے اور اس عمل کو الیکشن ضابطہ اخلاق اور خواتین کے بنیادی حقوق کی سنگین اور کھلی خلاف ورزی قرار دیا ہے ۔ ایک مذمتی بیان میں انہوں نے کہاکہ خواتین کی آبادی ملک کی آبادی سے نصف فیصد سے زائد ہے اور موجودہ جدید اور ترقی یافتہ دور میں ضمنی الیکشن کے موقع پر پاکستان میں قومی اسمبلی کے مذکورہ حلقوں میں خواتین کوووٹ ڈالنے کے جمہوری حق سے محروم رکھنا دورِ جاہلیت کی نشانی ہے ۔ جناب الطاف حسین نے کہا کہ ابھی پولنگ کے عمل میں چند گھنٹے باقی ہیں لہٰذا میری الیکشن کمیشن آف پاکستان دردمندانہ اپیل ہے کہ وہ این اے 5نوشہرہ ، این اے 71میانوالی اور این اے 27لکی مروت میں خواتین کو ووٹ ڈالنے کے جائز حق سے محروم رکھنے کا سنجیدگی سے نوٹس لیں اور خواتین کواپنا حق رائے دہی استعمال کرنے کیلئے ان حلقہ انتخابات میں الیکشن ضابطہ اخلاق پر فی الفور عملدر آمد کراکر خواتین کو اپنا حق رائے دہی استعمال کرنے کا حق دیاجائے ۔