وزارت پانی و بجلی کی جانب سے کراچی سمیت دیگر شہروں کے گھریلو صارفین کیلئے بجلی 15 اور صنعتوں کیلئے 56 فیصد مہنگی کرنے پر ڈاکٹر نصرت کا اظہار مذمت

کراچی ۔۔۔20، اگست2013ء

متحدہ قومی موومنٹ کی رابطہ کمیٹی کے ڈپٹی کنوینرڈاکٹرنصرت نے وزارت پانی وبجلی کی جانب سے کراچی ، کوئٹہ ، اسلام آباد ، فیصل آباد اور لاہور سمیت دیگر شہروں کے گھریلو صارفین کیلئے بجلی 15اور صنعتوں کیلئے 56فیصد مہنگی کرنے کی سخت ترین الفاظ میں مذمت کی ہے اور بجلی کے نرخوں میں اس ضافہ کو موجودہ حکومت کی عوام کے زیادتی قرار دیا ہے ۔ایک بیان میں ڈاکٹرنصرت نے کہا کہ ملک بھر کے عوام سمیت تجارتی، کاروباری اور صنعتی طبقہ بجلی کی لوڈشیڈنگ کے سبب ماضی کی حکومت میں بھی عذاب میں مبتلا رہے ہیں اور موجودہ حکومت سے عوام کو یہ امید تھی کہ وہ ملک بھر کے عوام کو بجلی سمیت بنیادی سہولیات کی فراہمی کیلئے اپنا مثبت اور بھر پو کردار ادا کرے گی اور ماضی کی حکومت کی روش اختیار نہیں کریگی لیکن اس کے بجائے وزارت پانی وبجلی کی جانب سے مختلف شہروں کے گھریلو اور صنعتی صارفین کیلئے بجلی مہنگی کرنا ملک بھر کے عوام کیلئے انتہائی مایوس کن اقدام ہے۔انہوں نے کہا کہ ملک بھر کے عوام پہلے ہی مہنگایء اور بے روزگاری کے بوجھ تلے دبے ہوئے ہیں اور ان پر بجلی اور دیگر بنیادی سہولیات کی مد میں ریلیف کے بجائے اضافے در اضافے کی پالیسی برقرار رکھنا سراسرناانصافی اور ظلم ہے جس کی جتنی بھی مذمت کی جائے وہ کم ہے ۔ڈاکٹرنصرت نے وزیراعظم پاکستان نواز شریف اور وفاقی وزارت پانی و بجلی سے مطالبہ کیا کہ کراچی، کوئٹہ، اسلام آباد، فیصل آباد اور لاہور سمیت دیگر شہروں کے گھریلوصارفین کیلئے15اور صنعتوں کیلئے 56فیصد بجلی کی مد میں کیا گیا غیر منطقی اضافہ واپس لیاجائے اور ملک بھر کے عوام کو ریلیف کی فراہمی کیلئے بجلی کی مد میں فی الفور سبسڈی دی جائے۔